Gagauziyanın Baş küüyü (Kirsova) “Excluziv” yortulu sıralar salonunda geçän bu yaratmak avşamın ruhu, ihlamı hem yortulu soluu oldu raametli Maestro İlya İlyiç FİLEV, angısının büüleyici muzıkası hem gagauz poetların laflarına yazılı türküleri, üç saada yakın cannı öttüp, aydınnıklan yayıldı doz-dolaya.

Yaratmak avşamını açarak, Gagauziyanın kultura zaametçilerinin adından salonda bulunan İlya İlyiç FİLEVın eşinä Elena İvanovnaya, onun yakınnarına, yakın dostlarına, yaradıcılık ortaklarına hem hepsi insannara, ani o avşam geldilär bu muzıka çeşmesindän kanaat olmaa, selemnemä sözünnän danıştı Gagauziyanın Kultura upravleniyasının Başı Marina SEMÖNOVA angısı urguladı, ani “ büün bizi birleştirer İlya FİLEVın muzıkası, onun yaşayan hem daymalarda ötän yaratmak varlıı”.

Sora da, avşam uzunnuunda, İlya FİLEVın yarattıı hem şindän sora sonsuzun varlıı olan türkülerini çalan artistlär hem muzıkantlar, iş kolegaları hem o türkülerin laflarının avtorları, bütün ürektän Maestro için annadarak, paylaştılar kendi duygularınnan, birliktä yaşadıkları olaylarlan hem aklılarından geçirilän fikirlärlän.

Maestronun “Düz Ava” türkü hem oyun halk ansamblisindä çalışması hem onunnan yaradıcılık işbirlii için annattı ansamblinin öndercisi Maestro Tatyana ŞÇEGOLEVA.

Anılmış gagauz yazıcısı, poetı, jurnalistı, “Ana Sözü” gazetasının baş redaktoru, Akademik Todur ZANET, şükür ederäk Gagauziya Kultura Upravleniyasına hem bu avşamı hazırlayan hepsi insannara hem dä, özellikän, Maestronun eşinä Elena İvanovna FİLEVAya o musaafirlik, daynmak hem saburluk için, angısını Canabisi gecä-gündüz gösterdi avtorlara, türkülär yazılırkan, urguladı, ani kendisinin Maestroylan ortaklıkta yazılan 54 türkünün yaradılması pek kolay diildi. Kısadan annattı nicä yazıldı son başarılan türkü – “Analar”.

Todur ZANET sțenadan yalvardı, ani bir muzeyin saytında yalan yazılan sözlär, ani “İlya FİLEVa “Moldovanın İncäzanaatta Maestrosu” adını vermäk için danışmış Moldovanın ozamankı kultura ministrusu Monika BABUK”, doorudulsun, çünkü haliz doorusu bu: “İlya FİLEVa “Moldovanın İncäzanaatta Maestrosu” adını vermäk için bän, Todur ZANET, danıştım ozamankı Gagauziya Başkankasına İrina VLAHa ofițial bir yazılı kiyatlan. Canabisi dä baş urmdu Moldova Prezidentına İlya FİLEVa bu adı vermäk için. Da, açan Komratta Monika BABUK sțenada verärdi İlya FİLEVa bu üüsek adın dokumentlarını, benim hem Elena İvanovnanın önündä oturan İrina Födorovna VLAH döndü, dä dedi: «Сделала как Вы просили!».

O avşam Maestro için sözlerini söledilär: Yuliya ARNAUT, İrina GERASİMOVA, Mihail KULEV, Genadiy MİTİŞ, Todur MARİNOGLU, “Serin Su” ansambflinin öndercisi Födor RADİONOV.

İlya İlyiç FİLEVın anmasına adanmış yaratmak avşamında sțenadan çaldılar  “Düz Ava” türkü hem oyun halk ansamblisi, solistlar Vitaliy VASİLİOGLU hem İrina POYDOLOVA, Andrey İVANOV, Yuliya ARNAUT, İrina GERASİMOVA, Olga PAÇİ, İvan BABOV, Elena PAÇİ, İlya hem Evdokiya KÖSÄ, İrina DRAGU, Nataliya DENİZ, Genadiy MİTİŞ, Valentin ORMANCI, Marina KISSA, Olesä TUKAN, Komrat kasabasının A. Valykov adına uşak muzıka şkolasının horu, “Voice Shov Studio” örnekli vokal studiyası.

Sıra geldiynän “Şen oynêêr gagauzlar!” (laflar – Todur Zanet) türküsünä, angısınnan İlya FİLEVın kurduu “Bucak” adlı gagauz estrada ansamblisi 1991-ci yılda Alma-Ata kasabasında (Kazahstan) olan II-ci Halklararası «Азия Дауысы» (“Aziya Sesi”) muzıka Festivalindä laureat oldu hem o türküyü orada çaldı solist Georgiy İvanoviç DUDOGLU, avşamı götürän Anna Markovna RUSU teklif etti 2026-cı yılın Harman ayın 19-da raametli olan çalgıcımızı Georgiy İvanoviç DUDOGLUyu anmaa da bütün zal ayak üstündä palma düümesinnän bu insana saygısını gösterdi.

Yaratmak avşamında ayırı şükür sözleri sölendi İlya İlyiç FİLEVın kumisinä Vasiliy Födoroviç DRAGANa, ani çok yıllar Maestroylan omuz-omuza durarak, zaametini saymadaan, gecä-gündüz kendi studiyasında yazdı, işledi hem inceletti İlya FİLEVın yaratmalarını hem şindi dä saygıylan koruyêr o muzıka arhivını hem verer kolayını onnar ötsünnär hem insannarın cannarına yolunu bulsunnar.

Bu avşamda ayırı bir er kapladı Elena İvanovna FİLEVAnın candan sözü, angısı, gözleri yaşlan dolu, şükür etti hepsinä kim geldi hem, can sıcaklıınnan, andı kocasını, adamını hem büük kompozitoru.

Başarıldı İlya İlyiç FİLEVın anmasına adanmış yaratmak avşamı gagauzların ofițial olmayan gimnasınnan – “Yaşa, Halkım!” türküsünnän (laflar – Todur Zanet), angısını bütün zal ayak üstü hem bir seslän çaldı.

Ortak patrettän sora da hepsi insannar buyur edildilär pomana sofrasına, angısını hazırlamıştılar raametlini aylesi hem kumileri Vasiliy hem Alöna DRAGAN.

Bu yaratmak avşamı günündä, sabaalen, İlya FİLEVın eşi Elena İvanovna, kardaşı Viktor, Marina SEMÖNOVA, Tatyana ŞÇEGOLEVA hem bratanı Todur ZANET, Maestronun mezarına gidip hem orayı saygıylan çiçek koyup, Canabisini raametlän andılar.

Ayrı bir şükür sözü lääzım sölemää Gagauziya Radio hem Televideniye (GRT) cümne Kompaniyasına, angısı cannı yayında efira verdi bu büülü yaratmak yortusunu: https://www.youtube.com/live/zQQGVaQCpKw.

Büün, Harman ayın 19-da, anılmış gagauz  kompozitoru, “Gagauziyanın kıymetli kultura zaametçisi”, “İncäzanaatta Maestro” raametli İlya İlyiç FİLEV (19.08.1956 – 19.11.2024) duuma gününün 70-ci yıldönümünü kutlayaceydı.

Gagauzların büük kompozitoru, muzıka pedagogu hem muzıkantı, aranjirovkacısı İlya FİLEV duudu Gagauziyanın Komrat kasabasında. Burada büüdü. 1966-cı yılda henez açılan Komrat muzıka şoklasında başladı bayan klasında üürenmää hem başarıylan onu başradı. 1971-ci yılda yollandı Kişineva da burada Ştefan Neaga adına muzıka uçilişçesini (şindi – kolec) başarıp, tekrar evä döndü dä 1976-1986 yıllarında, halk muzıka tertipleri uurunda pedagog olarak, Komrat muzıka şoklasında kendisinin Allahtan vergisinnän gagauz halkına hem onun muzıka kulturasına izmet etmää başladı. Hep bu ara Canabisini iki yıllık armatasını yaptı.

Armatadan döndüktän sora, 1983-cü yılda İlya FİLEV girdi üürenmää Kişinevun Gavriil Muzıçesku adına incäzanaat institununa hem, 1988-ci yılda bu institutu başarıp, “Halk orkestrası dirijeru” hem “Halk muzıka tertipleri” zanaaları uurunda ustalıını kabletti.

1986-cı yılda İlya FİLEV başladı işlemää “Düz Ava” halk türküsü hem oyunu ansamblisindä, neredä tambur muzıka tertibindä çaldı.

1989-cu yılda, Moldova devlet filarmoniyasının kanadı altında, İlya FİLEV kurêr “Bucak” adlı gagauz estrada ansamblisini, angısınnan 1991-ci yılda yollanêr Alma-Ata kasabasına (Kazahstan) II-ci Halklararası «Азия Дауысы» (“Aziya Sesi”) muzıka Festivalinä, heredä “Şen oynêêr gagauzlar!” türküsünnän (laflar – Todur Zanet, muzıka – İlya Filev) Grand-Pri ödülünü alêr. Bundan kaarä hep bu türkü için İlya FİLEVa veriler festivalin “En islää aranjirovka” ödülü (Not. – bu festivaldä türkü “Konaklêêr gagauzlar” adınnan tanıdıldı).

Taa sora, 1993-cü yılda, “Bucak” gagauz estrada ansamblisinin adını “Seläm” adına diiştiriler. Eridir sölemää, ani bu ansambli 1993-cü yılda, Türkiyedä geçän “Ak deniz devletleri Halklararası festivali”ndä laureat oldu. 1994-cü yılda “Dnestrovskiye zori” konkursunda İlya FİLEVa verildi “En islää aranjirovka” ödülü. Hep o yılda ansambli “Hederlez – 1994” gagauz estradası konkursun laureatı oldu.

Nicä herkerä olêr, talantlı insannarın yolunu kesmäk için, devlettä “para kıtlıı” peydalanêr da bu üzerä 1995-ci yılda “Seläm” ansamblisinin ömürü sona vardı.

İşsiz kalınca, İlya FİLEV kendisinä Rusiyanın Sankt-Peterburg kasabasında iş bulup, bir parça ekmek kazanmaa başlêêr. Burada da bela onu brakmêêr. Burada işledii restorannarın birisindä yangın olêr da onun sintezatoru hem hepsi tertipleri yanêr. Bu olaydan sora, İlya FİLEV geeri döndü da, strestan kurtulmak için, kendisini kompozitorluk işinä hem üüredicilää urdu. Kolaylıı olduynan, genä Komrat muzıka şkolasında hem Komrat Devlet Universitetın kultura hem incäzanaat kafedrasında işlemää başladı, ama kompozitorluk içindän son gününädän atılmadı.

Büün bir şüpesiz var nicä sölemää, ani, kompozitor olarak, İlya FİLEV biliner diil salt Gagauziyada hem Moldovada, ama bütün türk dünnäsında da. O kendi Halkının patriotu hem muzıkanın can izmetçisi. Gagauz poetların çoyunun peetlerini muzıkaya koydu. Ama en bereketli hem en çok türkülär yaptı gagauz poetı Todur ZANETlän birliktä: “Yaşa, Halkım!”, “Bendä var bir Vatan”, “Canım, Vatanım, Gagauziyam”, “Gagauziya – sän bir Ana!”, “Birlik türküsü”, “Gagauz kadıncası”, “Gagauziyada Hederlez” (Hederlez yortusunun gimnası), Gagauziyada Marțişor” (Marțişor yortusunun gimnası), “Gagauziyaya Gimna”, “KDU Gimnası”, “Komrat muzıka şkolasının Gimnası”, “Kemençä”, “Can sancısı” hem çok-çok taa başka türkülär.

İlya FİLEVın dünneyä baaşladıı son türküsü oldu “Analar” türküsü (laflar – Todur Zanet), angısının premyerası oldu 2023-cü yılın Kırım ayın (dekabri) 22-dä I-ci “ENİ TÜRKÜ” yarışmasında. Burada “Analar” türküsü, angısını çaldı türkücüyka Yulia ARNAUT, Grand-Pri ödülünü kazandı hem halizdän öttü analara hem bütün karı kulluuna bir Gimna gibi da onu bütün zal aalayarak sesledi.

Söz gelişi İlya FİLEVın talantınnan yaradıldı Gagauziyanın kimi kasbalarının hem küülerinin Gimnaları da.

2024-cü yılın Kasım ayın 19-da Maestro İlya FİLEV vakıtsız sonsuzlaa vardı. Ama onun yarattıı büülü muzıka şedevraları hiç bir zaman dünnää üzündän kayıp olmayacek, çünkü onnar gagauz halkının derin kökündän hem cömert canından gelmä. O üzerä dä Maestro İlya FİLEV hem onun aydınnık dünneyi büüleyän muzıkası daymaların-daymalarında kalêrlar hem kalaceklar.

İlya FİLEV canını muzıka dünnesinä hem gagauz kulturasına baaşlayan bir geniy!

Paalı Maestro, Senin Adın unudulmaz hem Canabin bizä okadaradan doldurulmaz bir er braktın…

Todur ZANET

Bu konțerttä Vitaliy MANJULlan barabar sțenaya çıktılar artistlär, artistkalar hem ansamblilär: Mariya BUZACI, İrina DRAGU, Tatyana MİTİOGLU, Pört PETKOVİÇ, Gagauziyanın kymetli “Düz Ava” türkü hem oyun ansamblisi, “Karanfil” oyun ansamblisi, “Kolay Seslär” vokal studiyası hem “Sevda” folklor kolektivı.

Konțert sırasında Vitaliy MANJULu 55-ci yıldönümünnän kutladılar Gagauziyanın Kultura upravleniyasının Başı Marina SEMÖNOVA, Gagauziya İspolkomu Predsedatelin yardımcısı İlya UZUN, Gagauziya Halk Topluşun geçici Başı Nikolay ORMANCI, Gagauziyanın kymetli “Düz Ava” türkü hem oyun ansamblinin artistika önderciykası Maestro Tatyana ŞÇEGOLEVA, Komrat Kultura Evin direktoru hem yubilärın kızkardaşı Marina MANJUL.

“Sergey FİLİOGLU adına I-ci fortopiano hem kamera muzıkasında Respublika festivali” adandı raametli anılmış muzıkacı, pianist, konțertmeyster hem pedagog Sergey Vasilyeviç FİLİOGLOnun (07.04.1976 – 05.11.2025) duuma günün 50-ci yıldönümünä hem onda pay aldılar universitetların, konservatoriyanın, muzıka şkolaların üüredicileri hem studentları.

Festivalin şannı musaafirleri oldular Kişinev A.Stırça adına İncäzanaat şkolasının direktoru, “Maestru în Artă” İ. V. BOGATAYA hem Respublikadakı S. Rahmaninov adına lițeyin pedagogu Dr. V. İ. STOYANOVA.

“Sergey FİLİOGLU adına I-ci fortopiano hem kamera muzıkasında Respublika festivali” sırasında oldu “Muzıka, teatru hem resimcilik incäzanaatları Akademiyası”nın fortopiano kafedrasının başının, Moldovanın halk artistın, “Maestru în Artă” Prof. Anatoliya LAPİKUSun master-klası, neredä Canabisi festifalä katılannarlan paylaştı kamera muzukasında kendisinin üstolan ustalıınnan.

2023 yılın Kırım ayın (dekabri) 22-dä, Gagauziyanın kultura Upravleniyasının çalışmasınnan yapılan I-ci “ENİ TÜRKÜ” yarışmasında “Analar” (laflar Todur ZANET, muzıka – İlya FİLEV) türküsünnän Grand-Pri ödülünü kazandı anılmış türkücüykamız Yulya ARANAUT (bak: https://anasozu.com/i-ci-eni-turku-yarismasinin-grand-pri-odulu-yulya-aranautta/).

Ondan sora Gagauziyanın kultura Upravleniyasının Başı Marina SEMÖNOVA adadı bu türküyä bir videoklip yaptırmaa. Da te sindi “Analar” türküsünün videoklipını başarıldı hem dünneyä yayınnadı – https://www.youtube.com/watch?v=WDx0EHrx6w4&list=PPSV&t=11s.

“Analar” trüküsü – bu bütün dünneyin analarına baaşlı hem o analara sevgiylän dolu bir türkü.

“Gagauziyada Marțişor” muzıka festivali – bu büük bir kulturalı yortu, neredä filizlendikçä açılêr Gagauzların hem Gagauziyanın milli kultura varlıı hem dostluk birlii.

Bu yıl “Gagauziyada Marțişor – 2025”: İLKYAZIN HEM MUZIKANIN TRİUMFU” muzıka festivalin Komrat Kultura evindä yapılan açılış sırasında Maestro Tatyana ŞÇEGOLEVAnın “İlkyaz hem muzıka” yaratmak avşamı da bu festivalä ayırı bir dad verdi.

Maestro Tatyana ŞÇEGOLEVA kultura dünnääsının anılmış insanı, üüredici, muzıkacı, dirijör, “Maestro în arta” (“İncäzanaatta Maestro”), “Gagauziyanın kıymetli kultura zaametçisi” hem Moldova Respublikasının kıymetli adını taşıyan Semön POMETKO adına “Düz Ava” örnekli türkü hem oyun halk ansamblisinin öndercisi, angısı bütün ömürünü baaşladı gagauz muzıka kulturasının korunmasına hem ilerlemesinä. Canabisinin yorulmak bilmeyän zaametinnän gagauzların kulturasını, türkülerini hem halk oyunnarını tanıdılar bütün dünnääda.

“Gagauziyada Marțişor – 2025” muzıka festivalinä gelän Gagauziya Başkankası Evgeniya GUȚUL, “İlkyaz hem muzıka” yaratmak avşamı sırasında, Maestro Tatyana ŞÇEGOLEVAnın milli kultura varlıın korunmasında hem geliştirmesindä üstün olan izmetleri, sonsuz çalışması hem ana kulturasına sevgisi için, Canabisini  “Mihail Çakir” ordenınnan ödülledi.

Kutluca olsun, Maestro Tatyana ŞÇEGOLEVA!

İnsannar raametli kompozitorlan prost olsunnar hem son yoluna geçirsinnär deyni, Gagauziya kultura Upravleniyası üstünä aldı hepsi zaametleri hem çalışmaları, da yakınnarı İlya İlyiç FİLEVın ölüsünü Kasım ayın 21-dä saat 10:00-da Komrat Kulruta Evin sțenasına erleştirdi. Burada, 3 saatlık bir yaslı sırada, biri-birleri ardına Maetronun havalarını hem sıraya uygun havaları çaldılar “Düz Ava” örnekli türkü hem oyun halk ansamblisi, angısında Canabisi 3 yıl çalıştı, hem da “Elegiya” kemençecilär ansamblisi. Sandıın önündä diziliydilär Maestonun ödülleri: “Mihail Çakir” ordenı, “Gagauziyanın kıymetli kultura zaametçisi” hem “İncäzanaatta Maestro” Belgileri, türlü Diplomnar hem Gramotalar.

Sțenanın iki tarafında kurulan ekrannarda dayma gösterildi İlya İlyiçin yaratmak ömürünü kısadan annadan bir vidio.

İlya İlyiç FİLEVlan prost oldular üzlärcä insan: onun yakınnarı hem dostları, muzıkantlar hem artistlär, kultura zaametçileri hem yazıcılar, Gagauziya İspolkom azaları hem Gagauziya Halk Topluşun deputatları hem da taa çok-çok insannar, ani Moldovanın çeştli erlerindän hem başka memleketlerdän gelmiştilär. Maestroya son borcunu vereräk, maasuz taa Moskvadan geldi bizim anılmış türkücüykamız Lüdmila TUKAN.

Maestroya venoklar hem çiçeklär, candan gelän göz yaşları hem aylesinä acızgannık sözleri durmamayca akardı bu sțenada. Cannarını açıklamaa deyni, bir teklifsiz mikrofona yaklaşardılar insannar da İlya İlyiç FİLEV için kendi fikirlerini hem duygularını sölärdilär. Bunnar: “Düz Ava” ansamblnin öndercisi Tatyana ŞÇEGOLEVA, Gagauziya kultura Upravleniyasının başı Marina SEMÖNOVA, muzıkant hem kompozitor İvan LÜLENOV, akademik hem poet Todur ZANET, Komrat muzeyin direktoru Vladislav MARİNOV, “Gagauzskiye korobeyniki” ansamblisinin öndercisi Boris NOVAK, Komrat primarı Sergey ANASTASOV hem başkaları.

Tatyana ŞÇEGOLEVA urguladı “İlya İlyiç FİLEV – bu bir epohadır!”

Marina SEMÖNOVAnın “Maestro, biz seni özleyecez hem aarayacez” lafları hepsiciini yaş içinä attı.

Todur ZANET sa, okuyup kendi “KALARSAYDI – KALÊR ADIN” dörtlüünü “Dündän, büünä hem yaarına, / Geçeriz biz adım-adım. / Ömür dolêr damna-damna, / Kalarsaydı – kalêr adın.”, dedi: “Bratan, Senin adın kaldı!” da, danışıp Gagauziyanın büüklerinä, ekledi “teklif ederim İlya İlyiç FİLEVın adını temelleştirmää da onu byustunu Gagauziyanın “Şan Aleyası”nda koymaa, zerä İlya FİLEV artık bizim klasiimiz. Bundan kaarä bir şkoyaa hem bir sokaa maestronun adını vermää”.

Sıra geldiynän İlya İlyiç FİLEVın ölüsünü kaldırmaa hepsi insannar şamar düümesinnän geçirdilär onu taa yas avtobusuna koyunca hem Komradın eni mezarlıına yollanınca.

Maestro İlya İlyiç FİLEVın ölüsü Komrat mezarlıın klisesindä okundu hem bu mezarlıkta topraa verildi.

Canabisinin ölüsü kendi evindän Komrat Kulruta evinädän hem taa sora da mezarlaadan Gagauziya Başkanın duhovoy orkestrasınnan yola geçirildi.

Moldova Parlamentın deputatları da, Parlamentın Kasım 21-dä olan toplantısında, ayakta bir minut susmak duruşunnan Maestro İlya İlyiç FİLEVa saygı gösterdilär.

Gagauziya Radio hem Televideniye Cümne kompaniyası da bu yaslı sıra için kendi haberlerindä durmamayca annattı. Kolverimin birisi burada: https://grt.md/gagauziya-gun-gundan-67-yasinda-ma%c8%87stro-gecindi/

İlya İlyiç FİLEVın aylesinä hem yakınnarına, dostlarına hem yaratmak kafadarlarına, bütün gagauz halkına Canabisinin sonsuzlaa vakıtsız varması sebepinnän kendi can sancımızı hem acızgannıımızı bildireriz!

Topracıın ilin olsun, Bratan!

İlya İlyiç FİLEVın aylesinä hem yakınnarına, dostlarına hem yaratmak kafadarlarına, bütün gagauz halkına Canabisinin sonsuzlaa vakıtsız varması sebepinnän kendi can sancımı hem acızgannıımı bildirerim!

Topracıın ilin olsun, Bratan!

Todur ZANET

Komrat kultura Evindä geçti I-ci “ENİ TÜRKÜ” yarışması, neredä pay aldı 16 yarışmacı 18 türküylän.

Şindi Gagauziyanın kultura Upravleniyası bildirdi, ani 2024-cü yılda ikincisi yapılan gagauz dilindä “ENİ TÜRKÜ” Regional yarışmasına yol veriler. Yarışmada pay almaa isteyennär danışmalarını Kasım ayın 25-dän gagauzcultura@gmail.com adresinä yollasınnar:

Yarışma bu yıl da 3 nominațiyada yapılêr:

1. En islää muzıka hem aranjirovka;

2. En islää peet;

3. En islää türkücü.

Yarışma için taa derindän bu telefonda 0298 2-49-35 hem burada: https://drive.google.com/…/15JLTLQyoMUW4EcJrnwu…/view…

https://docs.google.com/…/1kz…/edit…

“ENİ TÜRKÜ” yarışmasında vardı nicä katılsınnar gagauz dilindä türkülärlän 14 yaş yukarı olan kişilär (solistlar, duetlar, triolar hem ansamblilär) hem onda pay aldılar: İlyä hem Evdokiya KÖSÄlär (“Gagauziyam” türküsünnän), Yuliya ARNAUT  (“Analar” türküsünnän), “Serin-su” vokal ansamblisinin solistleri İrina GERASİMOVA hem Valeriy ARNAUT (“İnanmêêrım” türküsünnän), Andrey PALİK (“Воваmа” hem “Gelsän” türkülerinnän), Tatyana UZUN (“Sevgili küüyüm Kıpçak” türküsünnän), Mihayil PAÇİ (“Hederlez” türküsünnän), Viktoriya ARNAUT (“Sendän sora” türküsünnän), İlyä KALAK (“Kasım yortusu” türküsünnän), Tatyana KARASENİ (“Küçük bir vatanım” türküsünnän), “TOZİ” grupası (“Kırbaalı küyüm” türküsünnän), Andrey İVANOV (“Aalemin” türküsünnän), Evdokiya PETKOVİÇ (“Aylä türküsü”nnän), Sergey ARABADCI (“Yaz geçti” türküsünnän), Marina TOPAL (“İnan” türküsünnän), Vasiliy VARBAN (“Kurtulmak yolu” hem “Gelmäz geeri” türkülerinnän),  “ANA TARAFIM” vokal-instrumental ansamblisi (“Vatanım” türküsünnän).

Yarışmanın jürisi oldular Gagauziyanın hem Moldovanın anılmış insannarı: Marina RADİȘ –opera zannatçısı, “Maestru ın Arta”; Tatyana ŞÖGOLEVA – “Düz-Ava” gagauz türkü hem oyun ansamblisinin artistik öndericisi, “Maestru ın Arta”; Mariya TARANENKO – “Kadınca” türkü hem oyun ansamblisinin artistik öndericisi, “Gagauziyanın kıymetli kultura zaametçisi”; Pötr PETKOVİÇ – anılmış türkücü, muzıkacı, “Maestru ın Arta”; Mihayil REZUNEȚ – aktör, dramaturg, rejisör, “Gagauziyanın kıymetli kultura zaametçisi”; Elena MOKANU – gagauz dili üüredicisi, peetçi, “Gagauz yazıcılar birlii” azası.

“ENİ TÜRKÜ” yarışmasının siiredicileri arasında vardılar Gagauziya Başkankası Evgeniyä GUȚUL hem İspolkom azaları da.

Yarışma başında hepsi insannara selemnemä hem nasaat sözünnän danıştı Gagauziya kultura Upravleniyasının başı Marina SEMÖNOVA.

Jürinin kararına gärä “ENİ TÜRKÜ” yarışmasının ödülleri bölä payedildi:

I-ci “ENİ TÜRKÜ” yarışmasının Grand-Pri ödülünü kazandı Yulya ARANAUT – türkü “Analar” (laflar Todur ZANET, muzıka – İlya FİLEV).

Kalan nominațiyalarda:

“En islää muzıka hem aranjirovka”: 1-ci er – kompozitor, “Maestru ın Arta” İlya FİLEV (türkü “Analar”); 2-ci er – Viktoriya ARNAUT; 3-cü er – “ANA TARAFIM” vokal-instrumental ansamblisi.

“En islää türkü lafları”: 1-ci er – poet Todur ZANET (türkü “Analar”); 2-ci er – Tatyana GAYDARCI; 3-cü er – Andrey PALİK.

“En islää türkücü”: 1-ci er – Andrey İVANOV (türkü “Aalemin”); 2-ci er – İlyä hem Evdokiya KÖSÄlär; 3-cü er – Evdokiya PETKOVİÇ.

“Siiredicilerin maasuz ödülü”: Tatyana UZUN.