Gagauziyanın Baş küüyü (Kirsova) “Excluziv” yortulu sıralar salonunda geçän bu yaratmak avşamın ruhu, ihlamı hem yortulu soluu oldu raametli Maestro İlya İlyiç FİLEV, angısının büüleyici muzıkası hem gagauz poetların laflarına yazılı türküleri, üç saada yakın cannı öttüp, aydınnıklan yayıldı doz-dolaya.

Yaratmak avşamını açarak, Gagauziyanın kultura zaametçilerinin adından salonda bulunan İlya İlyiç FİLEVın eşinä Elena İvanovnaya, onun yakınnarına, yakın dostlarına, yaradıcılık ortaklarına hem hepsi insannara, ani o avşam geldilär bu muzıka çeşmesindän kanaat olmaa, selemnemä sözünnän danıştı Gagauziyanın Kultura upravleniyasının Başı Marina SEMÖNOVA angısı urguladı, ani “ büün bizi birleştirer İlya FİLEVın muzıkası, onun yaşayan hem daymalarda ötän yaratmak varlıı”.

Sora da, avşam uzunnuunda, İlya FİLEVın yarattıı hem şindän sora sonsuzun varlıı olan türkülerini çalan artistlär hem muzıkantlar, iş kolegaları hem o türkülerin laflarının avtorları, bütün ürektän Maestro için annadarak, paylaştılar kendi duygularınnan, birliktä yaşadıkları olaylarlan hem aklılarından geçirilän fikirlärlän.

Maestronun “Düz Ava” türkü hem oyun halk ansamblisindä çalışması hem onunnan yaradıcılık işbirlii için annattı ansamblinin öndercisi Maestro Tatyana ŞÇEGOLEVA.

Anılmış gagauz yazıcısı, poetı, jurnalistı, “Ana Sözü” gazetasının baş redaktoru, Akademik Todur ZANET, şükür ederäk Gagauziya Kultura Upravleniyasına hem bu avşamı hazırlayan hepsi insannara hem dä, özellikän, Maestronun eşinä Elena İvanovna FİLEVAya o musaafirlik, daynmak hem saburluk için, angısını Canabisi gecä-gündüz gösterdi avtorlara, türkülär yazılırkan, urguladı, ani kendisinin Maestroylan ortaklıkta yazılan 54 türkünün yaradılması pek kolay diildi. Kısadan annattı nicä yazıldı son başarılan türkü – “Analar”.

Todur ZANET sțenadan yalvardı, ani bir muzeyin saytında yalan yazılan sözlär, ani “İlya FİLEVa “Moldovanın İncäzanaatta Maestrosu” adını vermäk için danışmış Moldovanın ozamankı kultura ministrusu Monika BABUK”, doorudulsun, çünkü haliz doorusu bu: “İlya FİLEVa “Moldovanın İncäzanaatta Maestrosu” adını vermäk için bän, Todur ZANET, danıştım ozamankı Gagauziya Başkankasına İrina VLAHa ofițial bir yazılı kiyatlan. Canabisi dä baş urmdu Moldova Prezidentına İlya FİLEVa bu adı vermäk için. Da, açan Komratta Monika BABUK sțenada verärdi İlya FİLEVa bu üüsek adın dokumentlarını, benim hem Elena İvanovnanın önündä oturan İrina Födorovna VLAH döndü, dä dedi: «Сделала как Вы просили!».

O avşam Maestro için sözlerini söledilär: Yuliya ARNAUT, İrina GERASİMOVA, Mihail KULEV, Genadiy MİTİŞ, Todur MARİNOGLU, “Serin Su” ansambflinin öndercisi Födor RADİONOV.

İlya İlyiç FİLEVın anmasına adanmış yaratmak avşamında sțenadan çaldılar  “Düz Ava” türkü hem oyun halk ansamblisi, solistlar Vitaliy VASİLİOGLU hem İrina POYDOLOVA, Andrey İVANOV, Yuliya ARNAUT, İrina GERASİMOVA, Olga PAÇİ, İvan BABOV, Elena PAÇİ, İlya hem Evdokiya KÖSÄ, İrina DRAGU, Nataliya DENİZ, Genadiy MİTİŞ, Valentin ORMANCI, Marina KISSA, Olesä TUKAN, Komrat kasabasının A. Valykov adına uşak muzıka şkolasının horu, “Voice Shov Studio” örnekli vokal studiyası.

Sıra geldiynän “Şen oynêêr gagauzlar!” (laflar – Todur Zanet) türküsünä, angısınnan İlya FİLEVın kurduu “Bucak” adlı gagauz estrada ansamblisi 1991-ci yılda Alma-Ata kasabasında (Kazahstan) olan II-ci Halklararası «Азия Дауысы» (“Aziya Sesi”) muzıka Festivalindä laureat oldu hem o türküyü orada çaldı solist Georgiy İvanoviç DUDOGLU, avşamı götürän Anna Markovna RUSU teklif etti 2026-cı yılın Harman ayın 19-da raametli olan çalgıcımızı Georgiy İvanoviç DUDOGLUyu anmaa da bütün zal ayak üstündä palma düümesinnän bu insana saygısını gösterdi.

Yaratmak avşamında ayırı şükür sözleri sölendi İlya İlyiç FİLEVın kumisinä Vasiliy Födoroviç DRAGANa, ani çok yıllar Maestroylan omuz-omuza durarak, zaametini saymadaan, gecä-gündüz kendi studiyasında yazdı, işledi hem inceletti İlya FİLEVın yaratmalarını hem şindi dä saygıylan koruyêr o muzıka arhivını hem verer kolayını onnar ötsünnär hem insannarın cannarına yolunu bulsunnar.

Bu avşamda ayırı bir er kapladı Elena İvanovna FİLEVAnın candan sözü, angısı, gözleri yaşlan dolu, şükür etti hepsinä kim geldi hem, can sıcaklıınnan, andı kocasını, adamını hem büük kompozitoru.

Başarıldı İlya İlyiç FİLEVın anmasına adanmış yaratmak avşamı gagauzların ofițial olmayan gimnasınnan – “Yaşa, Halkım!” türküsünnän (laflar – Todur Zanet), angısını bütün zal ayak üstü hem bir seslän çaldı.

Ortak patrettän sora da hepsi insannar buyur edildilär pomana sofrasına, angısını hazırlamıştılar raametlini aylesi hem kumileri Vasiliy hem Alöna DRAGAN.

Bu yaratmak avşamı günündä, sabaalen, İlya FİLEVın eşi Elena İvanovna, kardaşı Viktor, Marina SEMÖNOVA, Tatyana ŞÇEGOLEVA hem bratanı Todur ZANET, Maestronun mezarına gidip hem orayı saygıylan çiçek koyup, Canabisini raametlän andılar.

Ayrı bir şükür sözü lääzım sölemää Gagauziya Radio hem Televideniye (GRT) cümne Kompaniyasına, angısı cannı yayında efira verdi bu büülü yaratmak yortusunu: https://www.youtube.com/live/zQQGVaQCpKw.

Vladimir MOMÇA bu festivalda Gagauziyayı temsil edän tek türkücü oldu. O çaldı Georgiy TOPALın “Gagauziya, kalk ayaa!” türküsünü.

Bakmadaan ona, ani karşısında bütün Moldovadan başarılı türkücülär vardılar, Gagauziyanın hem Çeşmäküüyü lițeyin onuru olan Vladimir MOMÇA becerdi “Ciocârlia” milli festival-konkursun pop muzıkası dalında 2-ci eri almaa.

Bütün ürektän kutlêêrız bizim talantlı türkücümüzü, onun aylesini hem bütün Gagauziyayı bu büük enseyişlän!

III-cü “ENİ TÜRKÜ” Regional yarışmasında pay aldılar: Viktoriya ARNAUT (“Yaşamak” türküsünnän; laflar – Galina DANACI, muzıka hem aranjirovka – İvan KURDOGLO); Dimitriy JELEZOGLU (“Kasım Çadırda” türküsünnän; laflar – Natalya JELEZOGLU, muzıka hem aranjirovka – Vasiliy JELEZOGLU); Evgeniy KALÇU (“Evä döndüm” türküsünnän; laflar – Evgeniy KALÇU, muzıka hem aranjirovka – Födor GAYDARCI); Tatyana KÜRKÇÜ (“Gel buluşalım” türküsünnän; laflar hem muzıka – Stanislav SOROKOV); İrina MELKAN (“Topalak” türküsünnän; laflar – Nikolay ESİR, muzıka hem aranjirovka – Konstantin DUŞKU); Viktoriya MEŞA (“Kızkardaşım” türküsünnän; laflar – Galina DANACI, muzıka hem aranjirovka – Yuriy BOYKOV, Dimitriy ZLATOV); Elena PAÇİ (“Senin adına” türküsünnän; laflar – Mihail PAÇİ, muzıka hem aranjirovka – Elena PAÇİ, Sergei TUMBA); Olga PAÇİ (“Gagauziya” türküsünnän; laflar – Galina DANACI, muzıka hem aranjirovka – Konstantin DUŞKU); Väçeslav hem Tatyana STANEV (“Güz sevgisi” türküsünnän; laflar – Aleksandra KRİSTOVA, muzıka hem aranjirovka – Väceslav STANEV); Marina TOPAL (“Pak sevgi” türküsünnän; laflar hem muzıka – Marina TOPAL); Sergey UZUN (“Meci” türküsünnän; laflar – Anatoliy TOPAL, Evgeniy AVRAMOV, muzıka hem aranjirovka – Sergey UZUN); Valeriya UZUN (“Uşakların suçu ne” türküsünnän; laflar – Anatoliy TOPAL, muzıka hem aranjirovka – Sergey UZUN); Galina YAYMAN (“Bän sınaştım” türküsünnän; laflar hem muzıka – Alla BÜÜK); VİA “Ana tarafım” (“Var vakıdım, yok vakıdım” türküsünnän; laflar – Vitaliy MANJUL, Anastasia RADOY, muzıka hem aranjirovka – İvan BUZACI, Anton JASANOV); VİA “Balon off” (“Umut” türküsünnän; laflar – Vasiliy KOMUR, Ana UZUN, Anastasia RADOY, muzıka hem aranjirovka – “Balon off”); VİA “OGUZHAN” (“Oguzhan” türküsünnän; laflar hem muzıka – Ruslan KIRNOV).

Jüri: Marina KARA-RADİȘ – opera zannatçıykası, “Maestru ın Arta”; Tatyana ŞÖGOLEVA – Gagauz Eri şannı kultura izmetçiykası, “ “Maestru ın Arta”, Düz-Ava” gagauz türkü hem oyun ansamblisinin artistik öndericiykası; Elena MOKANU – poetesa; Mariya TARANENKO-KISSA – Komrat “Kadınca” türkü hem oyun ansamblisinin artistik öndericiykası, Moldova Respukasının şannı artisti; İvan STATOV – çalgıcı, muzıkant, Kongaz “Taraf” vokal-instrumental ansamblisinin başı; İvan MİTİOGLU – Komrat kasabasının Andrey Valkov adına uşak muzıka şkolasının üüredicisi, “Çöșmä” halk instrumentleri orkestrasının bașı, “AXİS” gençlik merkezi orkestrasının başı.

III-cü “ENİ TÜRKÜ” Regional yarışma sırasında Gagauziya kultura Upravleniyasının başı Marina SEMÖNOVA, yarışmaya katılannarı selämnadı hem onnara en üüsek başarılar diledi.

Biri-biri ardı Komrat Kultura evin sțenasına çıkarak, yarışmaya katılan genç hem anılmış türkücülär kendileri tarafından hazırladıkları türküleri siiredicilerin önnerindä yaşamaya baaşladılar.

Bundan sora, III-cü “ENİ TÜRKÜ” Regional yarışmasının jürisi kendi kantarlama işini yapıp, 5 nominațiyaya görä, kararlarını açıkladı:

– III-cü “ENİ TÜRKÜ” yarışmasının “Grand-Pri” ödülünü kazandı Olga PAÇİ (“Gagauziya” türküsünnän; laflar – Galina DANACI, muzıka hem aranjirovka – Konstantin DUŞKU).

Kalan nominațiyalarda:

“En islää muzıka hem aranjirovka” nominațiyası: 1-ci er – Viktoriya ARNAUT (türkü “Yaşamak”); 2-ci er – VİA “Ana tarafım” (türkü “Var vakıdım, yok vakıdım”); 3-cü er – VİA “OGUZHAN” (türkü “Oguzhan”).

“En islää türkü lafları” nominațiyası: 1-ci er – Galina DANACI (türkü “Yaşamak”); 2-ci er – Nikolay ESİR (türkü “Topalak”); 3-cü er – Anatoliy TOPAL (türkü “Uşakların suçu ne”).

“En islää türkücü” nominațiyası: 1-ci er – Elena PAÇİ (türkü “Senin adın”); 2-ci er – Valeriya UZUN (türkü “Uşakların suçu ne”); 3-cü er – Dimitriy JELEZOGLU (türkü “Kasım Çadırda”).

“Siiredicilerin göz alımnılıı ödülü” nominațiyası: VİA “Balon off” (türkü “Umut”).

Bu yıl Gagauziya kultura Upravleniyası maasuz taa bir ödül kurdu – “Gagauziya Regional ses studiyasında bir türkü parasız yazmak ödülü” – ödül verildi Marina TOPALa (türkü “Pak sevgi”).

Jurinini kantarlama sırasında hem bütün ödüllemä hazırlanmak zamanında III-cü “ENİ TÜRKÜ” yarışmasına gelän sissredicileri sțenadan şennendirdilär: İrina MELKAN, Olga PAÇİ, Elena PAÇİ hem VİA “Ana tarafım”.

https://www.facebook.com/GagauziyaRadioTelevizionu/videos/1386385406608161

Nicä bildirdi bu şkolanın hem studiyanın önderciykası Olesä BARLADÄN, Gagauziyayı vokal uurunda II-ci “İncäzanaat bizi birleştirer” halklararası konkurs Festivalindä temsil ettilär “Güneş çancaazı” vokal şkolasının hem “Voice Show Studio” örnekli vokal studiyasının 6 solistı hem solistkası: Darya KAZAK, Dimitriy BODUR, Anastasiya STOYANOGLU, Darya İKİZLİ, Kaseniya TÜFEKÇİ hem Eva DUDUŞ.

Bu talantlı uşaklar Festivalin jürisinin önünä 13 vokal hem instrumental nomerleri çıkardılar. Jüri tarafından bu nomerlerin kantarlamasından sora, Gagauziyadan vokalcılarda 1 – 3-cü er ödülü, 3 – 2-ci er ödülü, 5 – 5-ci er ödülü, 1 – “Trafeu” ödülü hem dä 3 – “Grand-Pri” ödülü.

Bıldır “ENİ TÜRKÜ” yarışmasının II-si oldu. Şindi dä Gagauziyanın kultura Upravleniyası açıkladı gagauz dilindä III-cü “ENİ TÜRKÜ” yarışmasının yapılmasını.

III-cü “ENİ TÜRKÜ” yarışma 5 nominațiyada yapılêr:

1. En islää türkücü.

2. En islää avtorluk muzıkası hem aranjirovka;

3. En islää avtorluk peeti;

4. Grand-Pri ödülü;

5. Siiredicilerin göz alımnılıı ödülü.

Bu yarışmada pay almaa isteyännär lääzım Kırım ayın (dekabri) 10-dan bir danışmaklan baş ursunnar Gagauziyanın kultura Upravleniyasına bu elektron adresindän – gagauzcultura@gmail.com.

Yarışma için taa derindän burada: https://drive.google.com/file/d/1WCaDHIbmZzrTfNTXQ4vqYMaPGgdLARZp/view?fbclid=IwY2xjawOUCKJleHRuA2FlbQIxMABicmlkETE2akpBVzJZVmJhbWU1VE9vc3J0YwZhcHBfaWQQMjIyMDM5MTc4ODIwMDg5MgABHhB0GQTl-oNwP8HAeOFPgmd1vHInK1tC8gAr17kjepL73CEWI3Y4CyVxe0_T_aem_GF4qvoaA21Qfwid-HaHJVg

2023 yılın Kırım ayın (dekabri) 22-dä, Gagauziyanın kultura Upravleniyasının çalışmasınnan yapılan I-ci “ENİ TÜRKÜ” yarışmasında “Analar” (laflar Todur ZANET, muzıka – İlya FİLEV) türküsünnän Grand-Pri ödülünü kazandı anılmış türkücüykamız Yulya ARANAUT (bak: https://anasozu.com/i-ci-eni-turku-yarismasinin-grand-pri-odulu-yulya-aranautta/).

Ondan sora Gagauziyanın kultura Upravleniyasının Başı Marina SEMÖNOVA adadı bu türküyä bir videoklip yaptırmaa. Da te sindi “Analar” türküsünün videoklipını başarıldı hem dünneyä yayınnadı – https://www.youtube.com/watch?v=WDx0EHrx6w4&list=PPSV&t=11s.

“Analar” trüküsü – bu bütün dünneyin analarına baaşlı hem o analara sevgiylän dolu bir türkü.

Gagauziyanın 30-cu yıldönümünä adanmış olan Gagauz dilindä II-ci “ENİ TÜRKÜ” Regional yarışmamaya katıldılar: Elena PAÇİ (“Gagauziya Bucaam” türküsünnän; laflar hem muzıka – Mihail Paçi), Sergey UZUN (“Düşümdä sevda” türküsünnän; laflar – Todur Marinoglu, muzıka – Sergey Uzun), İlyä hem Evdokiya KÖSÄlär (“Birlik” türküsünnän; laflar hem muzıka – İlya Kösä), Olga PAÇİ (“Yalabık cennet” türküsünnän; laflar – Nikolay ESİR, muzıka – Konstantin Duşku), İvan TOPAL (“Kör ettin beni” türküsünnän; laflar hem muzıka – İvan Topal), Anna ZABUN (“Duuma erim” türküsünnän; laflar hem muzıka – Sergey Buyıklı), “Ana Tarafım” grupası (“Gagauz Erim benim” türküsünnän; laflar – Alla Bük, muzıka hem aranjirovka – Anton Jasanov hem İvan Buzacı), Tatyana KÜRKÇÜ (“Tarafım Bucaam” türküsünnän; laflar hem muzıka – Stanislav Sorokov), Evdokiya PETKOVİÇ (“Gagauziyam benim) türküsünnän; laflar hem muzıka avtorun), Dimitriy KADIN (“Yortu gecesi” türküsünnän; laflar hem muzıka – Dimitriy Kadın), Mariya GÜÇ (“Kurtar canını” türküsünnän; laflar – İvan Buzacı, muzıka hem aranjirovka – Anton Jasanov hem İvan Buzacı), Väçeslav hem Tatyana STANEVlar (“Sevgi” türküsünnän; laflar – Aleksandra Kristova, muzıka hem aranjirovka – Väçeslav Stanev), Elena HOROZOVA (“Dost” türküsünnän; laflar – Mariya Çoban, muzıka hem aranjirovka – Natalya Çoban).

II-ci “ENİ TÜRKÜ” Regional yarışmanın jürisi: Marina RADİȘ – opera zannatçıykası, “Maestru ın Arta”; Tatyana ŞÖGOLEVA – “Düz-Ava” gagauz türkü hem oyun ansamblisinin artistik öndericiykası, “Maestru ın Arta”; Polina İLYEVA – Mihail Çakir adına pedagogika kolecin üüsek didaktik uurunda üürediciykası, muzıka bölümün başı; Lazar KALOEV – Başkan orkestrasının hem “Kadınca” türkü hem oyun ansamblisinin azası, şannı incäzanaat zanaatçısı; Alöna ERGOGLO – Baurçu küüyün Kultura evin başı; Renat RADOV – muzıkant, Başkan orkestrasının azası, Komrat muzıka uşak şkolasının üüredicisi.

Gagauziyanın 30-cu yıldönümünä adanmış olan Gagauz dilindä II-ci “ENİ TÜRKÜ” Regional yarışmamasının başında, yarışmacılara, ii uurlar hem başarılar dileräk, selemnemä hem nasaat sözünnän danıştı Gagauziya kultura Upravleniyasının başı Marina SEMÖNOVA. Bundan sora yarışma başladı.

Hepsi yarışmacılar türkülerini çaldıktan sora, jüriyä kantarlama vakıdı vermäk için, sțenaya buyur edildilär Gagauziyanın Semön POMETKO adına “Düz Ava” örnekli türkü hem oyun halk ansamblisinin solistleri: Vitaliy VASİLİOGLO, Anna ÇEBAN, İvan BABOV, Andrey İVANOV.

Bundan sora II-ci “ENİ TÜRKÜ” Regional yarışmamanın jürisi, nominațiyalara görä, kendi kararlarını açıkladı.

II-ci “ENİ TÜRKÜ” yarışmasının Grand-Pri ödülünü kazandı Mariya GÜÇ – türkü “Kurtar canını” (laflar – İvan Buzacı, muzıka hem aranjirovka – Anton Jasanov hem İvan Buzacı),

Kalan nominațiyalarda:

“En islää muzıka hem aranjirovka” nominațiyası: 1-ci er – Konstantin DUŞKU (türkü “Yalabık cennet”); 2-ci er – Dimitriy KADIN; 3-cü er – Sergey UZUN.

“En islää türkü lafları” nominațiyası: 1-ci er – İlya KÖSÄ (türkü “Birlik”); 2-ci er – Alla BÜK; 3-cü er – Aleksandra KRİSTOVA.

“En islää türkücü” nominațiyası: 1-ci er – Elena PAÇİ (türkü “Gagauziya Bucaam”); 2-ci er – Olga PAÇİ; 3-cü er – Dimitriy KADIN.

“Siiredicilerin maasuz ödülü” nominațiyası: “Ana Tarafım” grupası.

Komrat kultura Evindä geçti I-ci “ENİ TÜRKÜ” yarışması, neredä pay aldı 16 yarışmacı 18 türküylän.

Şindi Gagauziyanın kultura Upravleniyası bildirdi, ani 2024-cü yılda ikincisi yapılan gagauz dilindä “ENİ TÜRKÜ” Regional yarışmasına yol veriler. Yarışmada pay almaa isteyennär danışmalarını Kasım ayın 25-dän gagauzcultura@gmail.com adresinä yollasınnar:

Yarışma bu yıl da 3 nominațiyada yapılêr:

1. En islää muzıka hem aranjirovka;

2. En islää peet;

3. En islää türkücü.

Yarışma için taa derindän bu telefonda 0298 2-49-35 hem burada: https://drive.google.com/…/15JLTLQyoMUW4EcJrnwu…/view…

https://docs.google.com/…/1kz…/edit…

Gagauziyada seftä geçän bu “Gagauziya hoşluum” yaradıcılık şkolasına katıldı yaradıcılık kolektivlarından hem uşak yaradıcılık evlerindän toplanan 8 komanda: “Altın Çöşmä” (Kongaz küüyündän halk oyun ansamblisi), “Çöşmä” (Komrat kasabasından halk muzıka orkestrası), “Çudo-deti” (Çadır kasabasından uşak oyun kolektivı), “Düz Ava” (Gagauziyanın şannı halk oyun ansamblisi), “Flame” (Svetlıy küüyündän oyun kolektivı), “Poläki Bucaka” (Komrat kasabasından halk oyun ansamblisi), “Yıdızlar” (Valkaneş kasabasından halk oyun ansamblisi) hem Komrat Uşak yaradıcılık evin komandası.

Gagauziya kultura Upravleniyasında çalışan insannarın zaametinnän “Gagauziya hoşluum” yaradıcılık şkolası pek meraklı hem faydalı geçti, çünkü şkolanın programası pek zengindi: intelektual yarışmaları, master-klaslar, yaradıcılık buluşmaları, şen oyunnar hem türkülär, angılarını şkolacılara deyni çaldılar Gagauziyanın artistleri.

Gagauz Avtonomiyasının kurulması için eni evlat boylarına annattı akademik, poet, yazıcı, dramaturg, aaraştırmacı, folklorcu, publiţist, çevirici Todur ZANET.

“Gagauz Bulguru” yapmak uurunda master-klas gençlerä  gösterdi Kazayak küüyündän “Sevda” folklor ansamblisi.

Türlü şenniklerdä komandalar annattılar kendileri için hem halk oyun oynamasında hem türkü çalmalarda becerikliklerini gösterdilär.

Gagauziya İspolkomun adından Gagauziyanın Başkankası Evgeniya GUȚUL yolladı “Gagauziya hoşluum” yaradıcılık şkolasında hepsi pay alannara baaşış – “power bank” dış akumulätorları.

Avşam üstü yapılan “Açık havada” diskotekada kendilerini kulturaya adayan gençlerä yaratmaklarını gösterdilär: Komrat yaradıcılık evin zamandaş musıkası Studiyası, İrina MELKAN, Elena PAÇİ, İvan JELEZNIY, Yulia AZİMOVA, Tatyana MİTİOGLU hem Vitaliy MANJUL.

“Gagauziya hoşluum” yaradıcılık şkolasnın sırası başarıldı bulgur datmasınnan, gagauz dostluk horusunnan hem gitara havalarında türkülärlän.

“Anev 2024 Türk dünnäsı kultura başkasabası” açılış sıraları pek genişti: ofițial tolpantıdan hem nasaatlardan kaarä, düzennendi resim hem el işleri sergisi, türk dünnesindän patret sergisi, Türkmenistanın hem türk milletlerin ortak konțerti oldu, hem da “Evelki Anay kulturası” Halklararası bilim konferențiyası yapıldı.

Gagauziya delegațiyasının öndercisi Gagauziya kultura Upravleniyasının başı Marina SEMENOVA katıldı may hepsi ofițial hem kultura sıralarınaa, ani oldu “Anev 2024 Türk dünnäsı kultura başkasabası” açılışında hem, Gagauziyadan başka baaşışlardan kaarä, baaşladı Türkmenistanın milli muzeyinä Todur ZANETin, gagauz kulturasının altın fondu olan, 3 tomnuk “Gagauzların kayıp olan dilinin hem kultura adetlerinin Moldovada korunması” bilim kiyatlarını.

Delegațiyanın azası türkücü Pötr PETKOVİÇ pay aldı konțerttä, muzeyci Lüdmila MARİN sa – Halklararası bilim konferențiyasında.

Açılışın kultura programası çerçevesindä yapıldı ekskursiya XV-ci asirdä düzülmüş “Seyit Cemal ad-Din” (türkm.: “Seýit Jemaleddiniň metjidi”) camisinä hem başka erlerä.