Kırım ayın (dekabri) 24-dä olan Moldovanın eni seçilän Prezidentın, Romıniya vatandaşı hem romın dilindä lafedän, Maya SANDUnun inagurațiyasına katılmadı Romıniyanın hem romın dilin “büük dostu” Gagauziya Başkanı İrina VLAH. Bilersiniz, ani büünkü günädän İrina VLAH kutlamadı Maya SANDUyu onun prezident seçilmesinnän dä.
Moldova vatandaşı olarak İrina VLAH var nicä ne istärsä yapsın, ama Gagauziya Başkanı olarak o lääzımdı Maya SANDUyu Moldova Prezidenti seçilmesinnän kutlasın. Ama bunu yapmadı!
Sanmayın, ani bu sadä bir karının öbürünä küsüsü!
Bu – İrina VLAHın tarafından uzaa gidän bir adım!
Bu – İrina VLAHın Gagauziyanın yok edilmesi için onun temelindän taa bir taşın sökmesi!
Bunnarı pek islää tutunuz aklınızda, zerä bu insancık hiç bir kerä boşuna bişey yapmêêr.
Bu iş tragediyalı olmaydı, bekim komik olaceydı. Genä dä işi şakaya çevirelim da aklınıza getirelim internettä gezän bu fıkrayı: “Herliim hepsi devletlerin prezidentleri karılar olaydı, ozamannar cenklär olmayaceydı, ama olaceydı pek çok memleket başları, ani biri-birilerinnän lafetmeyeceydilär”.
Ama bileriz, ani Prezident Maya SANDU, akıllı bir politikacı olarak, vatandaş İrina VLAHın tarafından tuzaa düşmeyecek da bu büünkü Gagauziya Başkanın suratsızlıını gagauz halkın esapsızlıı olarak kabletmeyecek.
Akademik hem poet Todur ZANET, Gagauz Millli Gimnanın avtoru
