Türkiyedän studetların ilerdeki zanaatlarında bilgilerini derinnetmää hem ustalıklarını kaavileştirmää deyni, Türk İşbirlii hem Koordinațiya Agenstvosu (TİKA) artık ikincilää Gagauziyada bir paylaşım programası düzenneer – bu kerä gelecektä injener olannar için.
Kişinev TİKA programaların koordinatorluk ofisin zaametinnän, gelecektä injener olacek Türkiyedän gelän 10 student için pek gözäl bir aftalık programa hazırlanmıştı. Başlayıp Kişinev TİKA programaları koordinatorluk ofisinnän hem ofisin çalışmalarınnan tanışmadan, studentlar Türkiye Hava Yolları (THY) ofisinnä gittilär hem Moldovanın baş kasabasını Kişinevu maasuz ekskursiya transportunnan gezdilär. Onnara Kişinevda TİKA tarafından yapılan proektları da gösterildi hem kolaylık verildi görmää Türkiye tarafından remont yapılan Moldova Prezidenturasının binasını hem kilim uzorlarında taşlarlan döşeli Kişinevun yayan gezilän sokaanı.
Gagauziyada programanın zanaatlık uurunda çalışmaları geçtilär Komratta Türkiye tarafından düzülän “Türkiye Prezidentın Recep Tayyip ERDOĞAN üüredicilik kompleksı”nda.
Bu çalışmalardan kaarä, programaya katılannarın oldu kolaylıkları tanışmaa Gagauziyada TİKAnın aslıya çıkarılmış proektlarınnan da: Komrattakı “Hoca Nastradin” adına modern yatılı uşak başçası, Komrat regional bolnițasının “Aziz SANCAR” adına alıştırma hem diagnostika korpusu, Komrat Recep Tayyip ERDOĞAN adına ihtärlar Evi hem taa başka.
Gagauziyaylan taa derindän tanışmaa deyni Türkiyedän studentlara ekskursiyalar yapıldı Komrat Devlet Universitetına, Komrat ATATÜRK bibliotekasına, Kongaz “Gagauz sofrası” kompleksına, Çadır kasabasının At fermasına.
Çadır kasabasında studentlar Türkiye 15 Temmuz şehitlerinä anmak nışan taşına çiçek koydular.
Komratta studentlar erindeki komandaylan bir futbul matçı oynadılar hem Ukraynada cenk betirinä Moldovaya ukraynalı kaçaklarına TİKA tarafından yardım paketleri vermä sırasında pay aldılar. Yardım sırasında başta TİKA Kişinev programaların Koordinatoru Selda ÖZDENOĞLU hem TİKA zaametçileri hem da Komrat primarı Sergey ANASTASOVlan primariya zaametçileri da pay aldılar.
Bu sıkışık, meraklı hem verimni programa başarıldıynan, Kişinev TİKA programaların koordinatorluk ofisindä hepsi günnerä bir incelemä yapıldı hem “Yabancı memlekettä injener olarak çalışmak” konulu söz oldu.
