CREPOR_Merkezi (1)

16.10.2024, tarafından yazılı , CÜMNE, MOLDOVADA TİKA PROEKTLARI BÖLÜMÜ, 675 KERÄ BAKILMIŞ

TİKA saalık uurunda eni proektı başa çıkardı

Canavar ayın 16-da Türk İşbirlii hem Koordinaţiya Agenstvosu Başkannıı (TİKA) tarafından yapılan Moldovanın tek olan Eksperemental protezlik, ortopediya hem reabilitațiya Respublikalı merkezin (Centrului Republican Experimental Protezare, Ortopedie și Reabilitare (CREPOR) 1-ci bölümünä enilenmäk proektın başırılmasının ofițial açılışı geçti.

Açılış sırasında pay aldılar Eksperemental protezlik, ortopediya hem reabilitațiya Respublikalı merkezin direktoru Veronika LEBEDİNSKİ, Türkiye Kişinev Büükelçisi Uygar Mustafa SERTEL, TİKA Balkannar hem Dou Evropa Dairesi Başkannı (BADA) Muhammed ÜNAL, Moldova Respublikası Parlamentın saalık hem soțial güvennii Komisiyanın Başı Adrian BELIY, Moldova Respublikası Parlamentın deputatı Boris MARKOÇ, Moldova Respublikası premyer-ministrunun veterannarın işlerindä danışmanı Konstantin KOVRİG, TİKA Kişinev ofisin koordinatoru Tarık METE.

Açılışta CREPOR Merkezin direktoru Veronika LEBEDİNSKİ şükür etti Türkiye Respublikasına hem TİKAya yardımnarı için hem yarım yıl içindä bölä gözäl bir proektın başarması için, angısı açêr kolayını taa islää izmet vermää kusurlulara hem cenk veterannarına.

Türkiye Kişinev Büükelçisi Uygar Mustafa SERTEL, açılışta bulunan CREPOR Merkezin medițina personalına başarılar dileräk, açıkladı, ani bir yıl geeri tanıştı CREPOR Merkezinnän da şindi var nicä sölemää, ani Merkezin durumu taa islää oldu. Canabisi urguladı, ani Türkiye Respublikası çalışêr Moldova Respublikasına her bir uurda yardımcı olmaa hem TİKA tarafından ömürä geçirilän proektlarlan önemni sonuçlara varılêr.

TİKA Balkannar hem Dou Evropa Dairesi Başkannı (BADA) Muhammed ÜNAL söledi, ani TİKA Kişinev programaları koordinatorluu ofisin 1994-cü yılda açıldıından beeri yakın 500 proekt aslıya çıkarıldı, angılarının arasında 50-si saalık uurunda. Canabisi açıkladı, ani seviner ki, TİKA tarafından enilenän hem mebellän hem da medițina oborudovaniyasınnan donatılan CREPORun 40 yataklı 1-ci bölümü verecek kolayını raatsızlar taa tez saalıklı yaşamalarına dönsünnär.

Eridir urgulamaa, ani Moldovanın tek olan Eksperemental protezlik, ortopediya hem reabilitațiya Respublikalı merkezi kuruldu 1945-cü yılda II-ci dünnää cengin sakatlarına protez fabrikası olarak. Büünkü gündä CREPOR Merkezindä 55 bin cenklär vetrannarına, onnarın arasında 11 800 Afganistanda hem Pridnestrovyeda cenklerin veterannarına da izmet veriler.
CREPOR_Merkezi (2) CREPOR_Merkezi (3) CREPOR_Merkezi (4) CREPOR_Merkezi (5) CREPOR_Merkezi (6) CREPOR_Merkezi (7)

BİR CUVAP YAZIN