Türkiyenin TRTAVAZ kanalında çıktı haber “TİKA’NIN DESTEĞİYLE HAZIRLANAN GAGAUZ TÜRKÇESİ ÇİZGİ FİLMLER SEYİRCİYLE BULUŞTU”, neredä annadılêr Türk İşbirlii hem Koordinaţiya Agenstvosu Başkannıın (TİKA) yardımınnan hazırlanan hem istoriyada ilk gagauz dilindä yaradan multiklär seriyası için, angılarının hepsi işleri (sțenariyaları, muzıkası, resimneri, donatımı) eni yazıldı hem yapıldı.
TRTAVAZ kanalı annadêr, ani TİKAnın yardımınnan hazırlanan hem istoriyada ilk gagauz dilindä yaradan multiklär seriyası artık siiredicilerinnän buluştu. Bu multiklerin hepsi işleri baştan sondan (sțenariyaları, muzıkası, resimneri, donatımı) eni yazıldı hem yapıldı. Büünkü günä kadar gagauzça çıkan multiklär başka memleketlerdän alınırdı hem, dubläj yapılıp, yayınnanardı.
Türk İşbirlii hem Koordinaţiya Agenstvosu Başkannıın (TİKA) tarafından iki yıla yakın ilerleyän bu proekt çerçevesindä, şindiyä kadar, 16 bölüm multik hazırlandı. Bu multiklär, Gagauziya Üüredicilik Upravleniyasının yardımınnan, bölgenin hepsi uşak başçalarına etişti hem orada siiredildi. Bundan kaarä onnarı gagauzça yayın yapan tek televideniye kanalı olan Gagauziya Radio hem Televideniya efirindä dä yayınnêr.
Uşaklar tarafından pek beenildii “Güneiä karşı” adlı multfilm seriyası verer kolayını uşaklara hem gençlerä gagauz adetleri hem sıraları yolunnan kendi kulturalarına ulaşmaa hem onu taa yakından tanımaa.
Bundan kaarä, Gagauziyadakı şkola öncesi üüredicilik kuruluşlarında 2020-ci yıldan beeri gagauzça hem romınca dildä üürenmäk programaları uygulanêr. Bu sebeplän ilgili hem romıncayı üürenmektä yardımcı olmaa deyni, gagauzça hazırlanan multiklerä romın dilindä alt yazı yapıldı.
Birleşmiş Milletlär Üüredicilik, Bilim hem Kultura Kuruluşu (UNESCO), Türk dillerin Oguz alt grupasına girän hem Türkiye türkçesinä en yakın dil olarak bilinän Gagauz dilini kayıp olmak kuşkuluu altında olan dillär arasında olduunu açıkladı. Bu üzerä, TİKA 1994-cü yılda Moldovada çalışmaa başladıı zamandan büünkü günädän, Gagauz dilinin yaşadılması hem gelecek evlat boylarına aktarılması noktasında pek çok proekt hem çalışma ömürä geçirdi.
