Geçän aftanın içindä Türk İşbirlii hem Koordinaţiya Agenstvosu Başkannıı (TİKA) getirdi hem daattı Moldovada (Gagauziyada, Belț hem Kişinev kasabalarında) iyecek hem gigiena mallarınnan 1000 kutu yardım o insannara, ani COVID-19 pandemiyası beterinä büük zorluklar çekerlär.
Yardımın birinci erinä, Gagauziyaya, yardımın 250 kutusu Çiçek ayın (aprel) 14-dä getirildi da, kardaş payı olarak, Komrat (110 kutu), Çadır (90 kutu) hem Valkaneş (50 kutu) rayonnarına verildi.
Şindi rayon başları hem küülerin primariyaları tarafından hazırlanan listelerä görä, yardım, bu aftanın sonuna kadar, zoru olan aylelerä daatılacek.
Yardımın ikinci noktası Belț kasabası oldu. Burayı Çiçek ayın (aprel) 15-dä hep 250 kutu iyecek hem gigiena malları yardım getirildi.
Bundan kaarä Belț kasabasının Uşakların yaratmak Evinä verildi Türk İşbirlii hem Koordinaţiya Agenstvosu Başkannıın (TİKA) tehnika yardımı da: 2 elektriklı dikmä maşinkası, 1 zaklöpka aparadı, 1 overlok maşinkası hem ek malları (medițina platları, ațıka, marli h.b.).
Nicä bildirdi Türk İşbirlii hem Koordinaţiya Agenstvosu Başkannıın (TİKA) Kişinev programaların Koordinatoru Selda ÖZDENOĞLU “bu tehnika yadımı Türkiyenın Moldovada COVID-19 karşı koymasında kardaş yardımı, ani verecek kolayını dikmää bu vakıtta ölä lääzımnı medițina maskalarını hem tulumnarını (kombinizon)”. Canabisi urguladı, ani hep bölä bir tehnika yardımı, en kısa vakıtta, Gagauziyaya da verilecek.
Yardımın üçüncü eri Kişinev kasabası oldu. Çiçek ayın (aprel) 16-da iyecek hem gigiena mallarınnan kalan yardımın 500 kutusu Kişineva verildi da onnar, Kişinev primariyasının yardımınnan zoru olan aylelerä etişecek.
