Orak ayın (iyül) 25-dä Moldova Prezidentı İgor DODON, Komrada gelip, Türkiye Respublikasının TİKA yolunnan burada yapılan uşak başçasını baktı.
Prezident İgor DODON baktı stroyka işlerin örümesini, metetti yşak başçasının düzülmesini hem umut etti, ani işlär vakıdında başarılacek.
TİKA Moldova Programaların Koordinatoru Canan ALPASLAN annatı Moldova Prezidentına bu proektın hazırlamasını hem uşak başçasında işlerin örümesini. Söledi, ani bu başçada kalaceklar o uşaklar, kimin anaları-bobaları yabancılıkta kazançta bulunêrlar. Canan ALPASLAN urguladı, ani uşak başçasının açılması bu yılın Kırım ayın (dekabri) 7-dä beklener.
Gagauziya İspolkom predsedatelin 1-ci yardımcısı Vadim Petroviç ÇEBAN annattı Moldova Prezidentına Gagauziyanın bu proekta yardımnarı hem katkısı için. O urguladı, ani Gagauziya aldı üstünä ükü bu obyekta dış kanalizaţiya sistemasını kurmaa, ayırıp bu iş için bücettän 1 milion 600 bin ley.
Türkiye tarafı da uşak başçasının yapması için 20 milion leydän zeedä para harcayacek.
Türkiyenin yaptıı uşak başçasında vizitında İgor DODONun yanında bulundular Gagauziya Başkanı İrina VLAH, GHT Başı yardımcısı Aleksandr SUHODOLSKİY, Komrat primarı Sergey ANASTASOV.
