Moldova üüredicilik, kultura hem aaraştırma ministrusu İgor ŞAROV 13.07.2020 günü açıkladı, ani başlayıp Ceviz ayın (sentäbri) 1-dän Moldova şkolalarında üürenmäk başlayacek, ama, koronavirus beterinä, onun proțesı lääzım ministerliin teklif ettii 7 kaluptan birisinä uysun.
Bu kalubu da lääzım barabar seçsinnär üüredicilär, analar-bobalar hem üürencilär.
1-ci kalup: Hepsi üürencilerin 100% şkolaya geler. Bu model uyêr Moldovanın 74% şkolasına, neredä 300 üürenciya kadar var. Burada üürencilerin arasında uygun arayı tutmak için kolaylık var.
Koronavirus beterinä burada var nicä urokları 30 minuda kadar küçültmää, uroklar arasını da zeedeletmää hem herbir şkolada lääzım birkaç giriş-çıkış kapusu olsun.
2-ci kalup: İki smenalık üürenmäk. Bunda prioritet başlangıç hem gimnaziya klaslarında var.
3-cü kalup: Kombinațiyalı üürenmäk, angısına görä şkolaya gelmä hem uzaktan üürenmäk günneri var. Bir gündä şkolaya uşakların yarısı geler, ertesi günü da öbür yarısı. Şkolaya gelmä günnerindä temalar üüreniler hem notalar koyulêr.
4-cü kalup: Grupalara görä her gün karışık üürenmäk. Üürencilerin yarısı şkolada, yarısı – onlainda. Onnar gün aşırı diişerlär.
5-ci kalup: Aftalarlan sıraycasına üürenmäk. Üürencilerin yarısı şkolada, yarısı – onlainda. Bu modelä görä klas iki smenaya bölüner: bir afta şkolada, bir afta onlainda.
6-cı kalup: Onlain rejimindän uzaktan üürenmäk.
7-ci kalup: Karışık üürenmäk, ani alêr içinä iki yada üç kalubu. Buna görä Moldovada var nicä işlesin 162 şkola, neredä üürencilerin sayısı 600-2000 arasında bulunêr.
