Harman ayın (avgust) 23-dä Türkiye Milli Olimpiada Komitetı hazırladı hem yaptı İstanbılda 32-ci “Boğazıçı (Bosphorus) Kıtalararası Yüzme Yarışı”. COVİD-19 pandemiya beterinä katılannarın sayısı, başka yıllara bakarak, biraz düştü, ama genä dä üüsek kaldı.
Bu yıl bu açık suda üzmeyä katıldı 14-74 yaş arası 34 devlettän 1765 kişi. Onnarın arasında Moldovadan 11 kişi da vardı.
Gagauziyanın Avdarma küüyündän anılmış sportçu, istoriyada bilim insanı İgnat KAZMALI bu yarışa 18-cilää katılêr. Bu kerä onun vakıdı: 1 saat 18 minut 9 sekund (48-ci er kendi kategoriyasında).
Genç gagauz sportsmenı Egor FORMUZAL (16 yaşında) Bosforu ayıkırladı 53 minutta 39 sekundta (51-ci er hepsi yarışçıların arasında).
