2020-ci yılın Canavar ayın (oktäbri) 28-dä Türkiye Respublikasının Kişinev Büükelçiliindä oldu bir sıra, neredä Moldovanın üürencilerinä hem üüredicilerinä Türkiyedän planşet hem noutbuk baaşışları verildi.
Baaşışları vermäk sırasında pay aldılar Türkiye Kişinev Büükelçisi Gürol SÖKMENSÜER, Moldova üüredicilik, kultura hem aaraştırma ministerliin ministrusu İgor ŞAROV hem Moldovada işleyän türk firmaların temsilcileri, ani bu yardım olsun deyni kolaylık yaptılar.
Bu iilii yapmak sırasında söz tutan Büükelçi Gürol SÖKMENSÜER açıkladı, ani bu planşet hem noutbuk baaşışları yardımnarın yapılması oldu Türkiye Respublikasının dışişleri Bakanı Mevlüt ÇAVUŞOĞLUnun Moldovaya vizitınan.
Türkiye Kişinev Büükelçisi urguladı, ani Moldovanın üüredicilik sistemasına bu yardımnar göstererlär, ani Türkiye – Moldovanın dostu hem ortaa hem herzaman onun yanındadır. Canabisi açıkladı, ani şindi verilän 27 bin evroluk yardımı (140 planşet hem 6 noutbuk) kurdular Moldovada türk firmaları hem devlet kuruluşları, ölä nicä THY (Türk Hava Yolları), “Onur”, “Asena Tekstil” h.t.b.
Kendi tarafından Moldova üüredicilik, kultura hem aaraştırma ministerliin ministrusu İgor ŞAROV şükür etti bu yardımnar için hem urguladı, ani planşetlar hem noutbuklar Moldova üüredicilik sisteması için uygundur da onnar üürencilerin hem üüredicilerin arasında pay edileceklär.
Baaşışları kablederäk ministr İgor ŞAROV kutladı hepsini Türkiye Respublikasının kurulmasının 97-ci yıldönümünnän, ani bakılêr Canavar ayın (oktäbri) 29-da.
Not. Ceviz ayında (sentäbri) Türkiye Kişinev Büükelçilii verdi 90 planşet hem 17 noutbuk Gagauziyanın Kırlannar küüyün İ.Sınku gimnaziyasına hem 135 planşetlan 16 noutbuk Moldovanın Kriulän rayonunun Drăsliceni komunasının Ratuş küüyün gimnaziyasının üürencilerinä hem üüredicilerinä. Ayırıca Canavar ayın (oktäbri) 23-dä Komratta olan VI-cı Halklararası “Invest Gagauzia-2020” investiţiya forumu zamanında Türkiye Kişinev Büükelçisi Gürol SÖKMENSÜER baaşladı Gagauziyanın üürencilerinä hem üüredicilerinä 120 planşet hem 6 noutbuk.
