Büük ayın (yanvar) 26-da Gagauziya Halk Topluşu birirnci okumakta 21 oylan kabletti Gagauzianın 2021-ci yıla defițitsız bücetını. Defițitlı bücet için sade bir deputat elini kaldırdı, altısı da ikiliktä kaldılar.
Gagauziya Başkanı savaştı kabledilsin 143 milion leylik defițitlı bücet da bununnan, Gagauziyayı büük borçlara sokup, onu artık halizdän yok etmää, teklif ederäk kendi keyfi için bankalardan kredit almaa hem Gagauziyanın son kalan varlıını satmaa.
Ani Gagauziya Başkanı, Gagauziya Halk Topluşuna yukardan aşaa dooru bakıp, o Topluşu cep Topluşu yapmaa savaşêr – bunu hepsimiz bileriz. Ani Halk Topluşu deputatlarından iirineräk hem zakonnarı ezeräk o aylarlan GHT toplantılarına gelmeer – bunu da bileriz. Ani Canabisi GHTda kalan bel kemikli deputatların bellerini diz aşırı kırmaa savaşêr – bunu da göreriz. (Belsiz olan nestä yalayannarı hiç anamaa da istämeeriz).
Hepsi bu mındar işlerä bakmadaan BU Deputatlar Başkankanın baskısına hep taa karşı koyabilerlär. Ama onnarın da vakıdı geçer da Çiçek (aprel) ayın 4-dä eni GHT seçimneri olacek – ozaman GHTya gelecek (osa getirelecek mi?) kişilär belli diil, zerä o seçimnerin dolayında da fasıl işlär döner. Onnarın birisi – Gagauziya Merkez Seçim Komisiyası için düüş.
GHT 26.01.2021 günündeki toplantısında MSKnın 9 azasından altısını ayırdıydı da o vardı nicä artık işlemää başlasın. Ama yukardan iplär çekildi da MCKya henez ayırılın İgor YANAK kadidaturasını geeri çekti, MSKyı çalışılmaz duruma getirip.
Bununnan GHT seçimneri da şüpä altına düştülär. Bu da Gagauziya Başkanına hem soțialistlär partiyasının hayırına: çünkü bunnarın avtoritetı Gagauziyada erdän aşaa düştü da belli, ani onnar enidän seçilämeyeceklär. Onuştan da onnar şindi kedinin (afedein – vakıdın) kuyrunu çekerlär.
