Hederlez ayın (may) 19-da, Türkiye Respubliklasının Büükelçilii hem TİKA zaametlerinnän, “ATATÜRKü anma” hem “Gençlik hem sport Günü” yortusunun 102-ci yılı Gagauziyada pek geniş bakıldı. Bu yortuları kutlama sıraları geçtilär Kongaz küüyündä hem Komrat kasabasında.
Kongaz küüyün Suleyman DEMİREL moldo-türk lițeyindä kutlamalar
Adetä görä, Gagauziyada “ATATÜRKü anma” hem “Gençlik hem sport Günü” yortusunun kutlaması başladı Kongaz küüyün Süleyman DEMİREL teoretik liţeyindän. Katılma sırasında geldilär Türkiye Kişinev Büükelçisi Gürol SÖKMENSÜER hem Büükelçiliin zaametçileri, Türkiye Respublikasının Gagauziya Komrat Başkonsulu Hasan AKDOĞAN, Kişinev TİKA programaların Koordinatoru Selda ÖZDENOĞLU, türk işadamnarı, Gagauziya Başkanı İrina VLAH hem Gagauziya İspolkomun azaları, Kongaz primarı Mihail ESİR hem taa çok şannı musaafirlär.
Yortunun ofițial kutlama sırası başladı saygı duruşundan hem Milli Gimnaların çalınmasından. Sora açılış sözünü tuttu Suleyman DEMİREL moldo-türk lițeyin direktoru Hasan CESUR hem yortulu nasaatlarını yaptılar Gagauziya Başkanı İrina VLAH hem Türkiye Kişinev Büükelçisi Gürol SÖKMENSÜER.
Bundan sora Süleyman DEMİREL teoretik liţeyindän peet yarışmalarında hem predmetlär Olimpadalarında pay alan üürencilerin ödüllenmesi oldu.
Bütün kutlama sıralarında lițeyin ansamblisi gösterdi türk, gagauz, moldovan hem çingenä halk oyunnarını.
Ofițial kutlama sırasında oldu enilenmiş ATATÜRK byustun hem sport meydanının açılışları.
Kongaz küüyün Suleyman DEMİREL moldo-türk lițeyindä “ATATÜRKü anma” hem “Gençlik hem sport Günü” yortusu başarıldı büük bilim hem kultura şenniinnän.
Yortu çerçevesindä Gagauziyaya saalık malları yardımı
Gagauziyada “ATATÜRKü anma” hem “Gençlik hem sport Günü” yortusunun çerçevesindä Komrat “Aziz SANCAR” adına alıştırma hem diagnostika Merkezindä oldu bir sıra, neredä Türkiye Respublikası adından Gagauziyaya 150 kislorod soluu modulü baaşlandı. Bu sıranın ofițial payında, Gagauziyanın medițina uurunda zaametçilerindän kaarä, pay aldılar Türkiye Kişinev Büükelçisi Gürol SÖKMENSÜER, Gagauziya Başkanı İrina VLAH, Türkiye Respublikasının Gagauziya Komrat Başkonsulunnan Hasan AKDOĞAN hem yardımı hazırlayan Türkiyenin “Onur İnşaat” Türk firmasının temsilcisi Bülent TATAR.
Komrat kultura Binasında kutlamalar
Gagauziyada “ATATÜRKü anma” hem “Gençlik hem sport Günü” yortusunun ilerlemesi oldu Komrat kultura Binasında, neredä Türkiye Yunus Emre İnstitutu, Komrat ATATÜRK bibliotekasınnan birliktä, düzennedi bir sergi hem tanıtma sırası eni çıkan “Türkiya Respublikası hem Gagauzlar: XX-ci asirin 30-cu yıllarında” kiyada (avtor S. BULGAR). Kiyadın tanıtmasından sora Semön POMETKO adına “Düz Ava” ansamblisi gösterdi bir kısa konțert, angısında öttü Vasiliy ÖKÜZÇÜnün (Veysel Arseven) yaratmaları. Baurçulu Vasiliy ÖKÜZÇÜ hem onun gibi gagauz gençleri XX-ci üzyılın 30-cu yıllarında ozamankı Türkiye Romınya Büükelçisi Hamdullah Suphi TANRIÖVERin çalışmalarınnan hem ATATÜRKün izininnän Türkiyeyä üürenmää gitmiştilär.
Patretlär: gagauzinfo.md hem facebook.com/kisinevbe/
