Gagauziya için hem gagauzlar için düşünän Gagauziya Halk Topluşun deputatların teklifinä görä, Hederlez ayın 28-dä lääzımdı olsun GHTnın sıradan dışarı toplantısı, neredä lääzımdı Halk Topluşuna eni seçimnerin günü kurulsun. Ama işlär tragikomediyaya döndülär…
Gagauziya Halk Topluşuna genä gelmedilär o deputatlar, angılarının kullanmak ipleri bulunêrlar Gagauziya Başkanın elindä.
En şaşılacek iş ta oldu o, ani Gagauziya Halk Topluşun Başı Vladimir KISSA kimi deputatların adından okudu bir “danışma”, neredä Gagauziyada hem Halk Topluşunda olan işlerdä kabaatlı buldu o deputatları, angıları halizdän Gagauziya için çalışêrlar.
Vladimir KISSA kendi seçimcilerinä hem, GHT başı olarak, bütün Gagauziyaya, zaamet edämedii için, nicä var bir laf: “Kedi etişmeyän erä “mındar” deer”, hepsi işlerdä kabaatlı buldu o deputatları, angıları halizdän Gagauziya için çalışêrlar.
Bu esapsızlaa hem kalın üzlülää en gözäl cuvabı verdi Gagauziya Halk Topluşun Çadır kasabasından deputat Nikolay İVANÇUK: “Surat kalın, nicä çarık. Hiç utanmêêrlar!”. Taa islää söleyämeyecän!
Toplantınının sonunda Gagauziyada kuvedin uzurpațiyası için bir açıklama kabledildi hem GHTnın sıradan dışarı toplantıyın ilerlemesini Kirez ayın 4-nä almaa.
