Başımızın belası COVID-19 koronavirus hastalıı dedikleri pandemiyası artık iki yıla yakın dalga-dalga üstümüzä geler. O ba üüseler, ba yok olêr, ama bir türlü savmışmêêr, gittikçä hep kökleşer: insannarın saalıını alıp hem ceplerini boşaldıp, onnarı kurban eder, eni ştamnar yaradêr, yılan gibi dünnää üzerindä kıvrılêr,
Nicä annaşıldı, şindilik, COVID-19 karşı privivkalar da yardım edämeer, zerä hererdä “privivka sertifikatı” mı, osa “pasportu” mu, erinä hep koronavirus testı isteniler. O testlar da may hererdä paralı.
COVID-19 oldu, osa taa baştan vardı mı, büük bir biznes-proekt. O proektı hazırlannar durmamayca para keserlär, sansın, aaret kapusuna geldiynän, onnarı yanına alaceklar.
Nicä da olsa – iş büüyer.
Moldovada koronavirus hastalıına ulaşan insannarın sayısı artık 255 bini geçti. Gösterilän statistikaya görä geler, ani burada insannar sadä bu hastalıktan öleerlär, sansın kalan hastalıklar yokmuş gibi – en aazdan bu fikir, batak gibi, irmi dört saat internettän hem televizorlardan üstümüzä döküler. Çıldırmaa var nicä!
COVID-19: Moldova hem Gagauziya durumu
11.06.2021. Moldovada COVID-19 durumu bölä: ulaşannar – 255661; ölennär – 6147; alışannar – 248348.
Gagauziyada ulaşannarın sayısı – 6961:
Çadır rayonu – 2422;
Komrat rayonu – 3534;
Valkaneş rayonu – 1005.
Ulaşannarın arasında:
adam kulluu – 105880 (ölän – 3012);
karı kulluu – 149661 (ölän – 3129);
aar kalan karılar – 1032.
