Kıpçak küüyündä ortalık kaynêêr – bir yılın içindä burada artık ikincilää yakêrlar insannarın mallarını. Bıldır, Harman ayın 13-dä, yaktılar küü Sovetinin sovetniinin Dimitriy KURDOVun traktorunu. 2021-ci yılın Kirez ayın 13-dä da, gecä saat 03:30-da, hep bu küüyün Sovetinin sovetniinin Valeriy MANASTIRLInın kombaynasını hem seyalkasını yaktılar.
Bilersiniz mi yangından kaare bu iki olayı ne birleştirer? Bu adamnar ikisi da isteerlär, ani Kıpçak küüyün “Pobeda” kolhozu insannarlan mal hem toprak annaşması yapsın. Ama kolhoz bunu yapmêêr.
2021-ci yılın Kirez ayın 19-da Kıpçak küüyün küü Soveti çabuk bir toplantısınd bu iki olaylan ilgili fikir dartışmaları yapıltı. Dartışmaların ana özüydü – küüdä kuvedi kriminal elä almaa isteer hem polițiyaylan prokuratura bu uurda parmaanı da kıpırdatmêêr. Bu belli olmuş ondan, ani bıldırkı yangın olayı aaraştırma işini polițiya durgutmuş, enisinä dä başlamamış.
İlktän yakêrlar, sora da öldüreceklär mi? İnsan neyä hazırlansın – cengä mi, 1990-cu yıla mı? Bu suruyşlardan Kıpçak küüyü korkularda bulunêr.
