2021-ci yılın Orak ayın (iyül) 15-dä, Türkiye Respublikasının “Demokratiya hem Milli Birlik Günü”n 5-ci yıldönümünnän ilgili olarak, Türkiye Kişinev Büükelçiliindä oldu bir yortulu sıra, neredä anıldılar onnar, kim 2016-cı yılın 15 Temmuz (Orak ayın (iyül) 15-şi) gecesindä FETOculara karşı çıktılar hem Türkiyeye için 251-si cannarını kurban verdilär, 2 bindän zeedä kişi da yaralandılar.
Büük saygıylan anarak o 251 şehiti, Türkiye Kişinev Büükelçilii verdi onnarın cannarı için Moldovanın içişleri ministerliinä 251 kutu iyecek yardımı, daadılsın deyni Moldovanın bütünnüü için raametli olan kahramannarın hem veterannarın aylelerinä.
251 kutu iyecek yardımı verilmä sırasında Türkiye Kişinev Büükelçisi Gürol SÖKMENSÜER, danışarak yardımı kabledän sırasında bulunan Moldova Devlet Sekretarinä Korneliu LEBEDİNSKİya, Moldova Pravitelstvosunun temsilcisinä, kutuları hazırlayan Türk İşbirlii hem Koordinaţiya Agenstvosu Başkannıın Kişinev TİKA programaların Koordinatorluuna, TC Büükelçiliin kolektivına, jurnalistlerä hem sıradan insannara, annattı o 5 yıl geeri olan işlär için, açan 2016-cı yılın 15 Temmuz gecesindä FETÖ teror organizațiyası, kullanarak satkın askerleri, halkın vergilerinnän alınan uçakları hem tankları hem teroristliklän barbarlık metodlarını, Türkiyedä demokratiyayı yıkmak için, Türkiyenin milletinä hem çok devlet kuruluşlarına urdu. Ama FETOcuların neeti aslıya çıkmadı, çünkü onnara çok insannar karşı koydular. O karşı koymakta 2 bindän zeedä insan yaralandı hem 251-ri da şehit oldu. O şehitlär Türk milletinin demokratiyada yaşaması için hem demokratiyaya hakkı için cannarını verdilär. Onuştan bu gündä dä Türkiye “Demokratiya hem Milli Birlik Günü”ni bakêr.
BüükelçiGürolSÖKMENSÜER dedi, ani bu 251 kutu iyecek yardımı saygı diil salt Türkiyenin şehitlerinä, ama saygı Moldovanın bütünnüü için cannarını verän kahramannara hem o bütünnük için düüşän veterannara hem onnarın aylelerinä.
Kendi tarafından Moldova Devlet Sekretari Korneliu LEBEDİNSKİ şükür etti Türkiye Respublikasına hem Türkiye Kişinev Büükelçiliinä bu yardım için.
“Demokratiya hem Milli Birlik Günü”n 5-ci yıldönümünnän ilgili olan Moldovanın içişleri ministerliinä 251 kutu iyecek yardımı sırasında Türkiye Kişinev Büükelçilii tarafından, 2016-cı yılın 15 Temmuz gecesini annadan, bir foto sergisi düzennendi.
“Demokratiya hem Milli Birlik Günü”n 5-ci yıldönümünnän ilgili olarak, Büükelçilik uşaklar arasında bir da resim yarışması yapmış. O yarışmayı kazanan genç resimciykaya sıranın sonunda ödül verildi – THY tarafından Kişinev-İstanbul gidiş-dönüş bileti.
