Orak ayın (iyül) 15-dä Çadır polițiyası, uydurma bir sebep bulut, kapadı Kıpçak küüyün küü Sovetinin sovetniini hem işadamını Valeriy MANASTIRLIyı, angısı gelecek Gagauziya Halk Topluşuna deputat seçilmää karar aldı.
Kıpçaklılar sayêrlar, ani bu kapamak – bir politika emiri. Çünkü Valeriy MANASTIRLI GHTya kandidatlıını çıkararsa, ozaman o, Kıpçak küüyündän büünkü Halk Topluşunda Gagauziya Başkanının cep deputatının Nikolay DRAGANın yolunu geçecek. Bu olmasın deyni onun zünü bataklamaa savaşêrlar.
Valeriy MANASTIRLInın kapanması politika emiri olduu için en aazdan göster o iş, ani Canabisini kolverdilär Gagauziya Başkannıın önündä kıpçaklıların protestından sora, bezbelli verilän, ikinci emirdän sora.
Ani Kıpçak küüyündä kuvedi yalayannarı hem baamsız kıpçaklıların arasında cenk başlêêr biz yazdıydık artık (bak: http://anasozu.com/insan-neya-hazirlansin-cenga-mi-1990-cu-yila-mi/). Yavaş-yavaş cengi çeketterinnär da belli olmaa başladılar.
Kıpçak küüyündä olan işlär için Orak ayın (iyül) 14-dä Kişinevda bir pres-konferențiyada Kıpçak küüyün küü Sovetinin sovetnikleri (Valeriy MANASTIRLI hem başkaları) açıkladılar, ani küüdä Nikolay DRAGAN predsedatelliindä kolhoz tarafından, Gagauziya öndercilerindän, polițiya hem prokuratura tarafından başsızlık yapılêr.
