Kırım ayın 21-dä Komradın “Güneşçik” («Солнышко») №4 uşak başçasında oldu bir yortulı sıra, angısı baaşlandı Gagauziyanın kurulmasının 27-ci yıldönümünä, neredä uşak başçasının hazırlanmak grupasının uşakları gösterdilär kendi talantlarını hem bilgilerini. Sıra başladı “Yaşa, Halkım” türküsündän (Laflar – Todur ZANET, muzıka – İlya FİLEV), angısının sesi altında gagauz milli rubalarına giimni uşaklar büük hodulluklan zala örüdülär, neredä onnarı karşladılar uşak başçanın zaametçileri, analar-bobalar hem şannı musaafirlär. Hepsi erlerinä geçtiinän, uşaklar hem zalda bulunannar, ayaa kalkıp, çaldılar Moldovanın hem Gagauziyanın Gimnalarından parçaları. Sora da kısa açılış sözünü tuttu “Güneşçik” uşak başçasının direktoru Otiliya ALBERTÄN.
Yortulu sıra pek meraklı geçti, çünkü onu hazırlayannar uşak başçasının gagauz dilindä terbidiciyka-üürediciyka Praskovya Georgievna ÇOBAN hem muzıka önderciykası Mariana Pantileevna KİRÇU becermiştilär uşaklara Gagauziyaya hem gagauz dilinä saygı hem sevda haşlamaa. Gagauziya için viktorinanın soruşlarına cuvap etmäk, gagauz poetların Ana tarafı hem Vatan için peetlerini okumak, Gagauziyanın Bayraanı resimnemäk, “Babunun hem dädunun evi” gagauz halk masalına insținirovka yapmaları, “Beygircik” yarışması, gagauz halk oyunu “Kadınca”yı oynamaları hem gagauz türkülerini çalması – hepsini bunnarı içinä aldı o gözäl hazırlanmış hem Gagauziyanın kurulmasının 27-ci yıldönümünä adanmış bu sıra.
Pek paalı bir meraklık taa vardı bu sırada – sıranın herbir nomerinä onu hazırlayannar verärdilär ayırı-ayırı slaydları o büük ekranda, ani bulunardı zalda. Bundan kaarä tematikaya görä kurulmuştu kiyat sergisi, gagauz evelki avadınnakların köşesi hem gagauz sofrası.
Yortulu sıranın sonunda söz verildi sıranın şannı musaafirlerinä poeta hem “Ana Sözü” gazetanın baş redaktoruna Todur ZANETä hem da Gagauziya M.V. Maruneviç adına Bilim-aaraştırma Merkezin başına İrina KONSTANTİNOVAya.
Poet Todur ZANET metetti uşakların gagauzçasını hem peetlerin gözäl annatmalarını, onnarın gözäl rubalarını hem gözäl oynamalarını, şükür etti, başta “Güneşçik” uşak başçasının direktoru Otiliya ALBERTÄN olarak, uşak başçanın zaametçilerinä, uşakların hem bu sıranın bölä islää hazırlanması için. Bitkidä dä okudu kendisinin uşaklar için yazılı peetlerini.
Gagauziya M.V. Maruneviç adına Bilim-aaraştırma Merkezin başı İrina KONSTANTİNOVA da pek metetti uşakların o günkü çalışmalarını hem çemrekliklerini, mayıl oldu onnarın milli rubalarına hem becerikliklerinä, kutlayıp uşakları hem uşak başçasının zaametçilerini bu başarılarlan hem bu yortuylan.
Komradın “Güneşçik” («Солнышко») №4 uşak başçasının Gagauziyanın kurulmasının 27-ci yıldönümünä adanmış sıra bittiktän sora hepsi zalda bulunnar, bireri toplanıp, ortak bir anmak patredi yaptılar.
