Baba Marta ayın 5-dän beeri Moldovada başlêêrlar şkola disțiplinaları olimpiadaları, angıları, kovid salgını kuşkuluunun beterinä, bu yıl olaceklar 3 merkezdä: Kişinevda, Belțta hem Komratta.
Komrat merkezindä olimpiada işlerini yazaceklar Basarabka, Çimişli, Kantemir, Komrat, Kaul, Leova hem Gagauziyanın 3 rayonundan rayon olimpiadalarını enseyennär.
Küçük ayın (fevral) 5-dän, Moldovanın rayonnarında şkola hem Regional olimpiadalar yapıldı. Bu vakıdın içindä, Gagauziyada olimpiadalar 15 şkola disțiplinasında oldu: angliya dili, biologiya, bulgar dili hem literaturası, ekologiya, fizika, gagauz dili hem literaturası, geografiya, himiya, informatika, istoriya, matematika, nemțä dili, romın dili hem literaturası, rus dili hem literaturası.
Bütün Gagauziyada hepsi bu olimpiadalarda 860 üürenci pay aldı, bildirer Gagauziyanın üüredicilik baş upravleniyası.
