Kasım ayın 30-da Kongaz “Todur Zanet” adına teoretik lițeyindä oldu bir buluşma, neredä romın dilindä laf gitti romın dili hem literaturası için. Buluşmada pay aldılar Moldova yazıcılar Birlii başı Teo KİRİAK (Teo CHİRİAC) hem yazıcı Todur ZANET.
Yazıcı, poet hem publițist Teo KİRİAK buluşmada annattı memlekettä romın dilin hem literaturasının önemni olduu için, söledi nicä çalışêr Moldova yazıcılar Birlii, ne uurlarda örüyer literatura hem baaşladı “Todur Zanet” adına teoretik lițeyin bibliotekasına moldoban klasika yazıcıların hem poetların kiyatların hem da Moldova yazıcılar Birlii jurnalını.
Todur ZANET tä, romın dilindä lafederäk, annattı Mihay EMİNESKUnun “Luçafar” hem “Çezara” yaratmaklarının gagauz dilinä çevirmesindä çalışmaları için hem da urguladı uşakların, ana dilindän kaarä, romın dilinin bilmesinin önemniini.
Buluşmada üürencilär iki dildä (hem romınca, hem da gagauzça) okudular o günkü lițeyin musaafirlerinin peetlerini. Üürenciykalar Nina GURAN hem Zinaida DOYKOVA, üürediciykalarınnan barabar, çaldılar romınca iki türkü.
Bundan kaarä üürencilär yazıcılara ölä gözäl hem çemrek soruşlar sordular, ani vardı nicä pek mayıl olmaa soruşların derinniinä hem üürencilerin gözäl romıncalarına.
Sıranın zamanında yazıcılara deyni lițeylän, onun bibliotekasınnan hem muzeyinnän bir tanışma ekskursiyası da yapıldı.
Bu buluşmayı hazırladılar lițeyin romın dilindä hem literaturasında üürediciykaları Praskovya PEYU hem Anastasiya TOMAYLI, belliki lițeyin direktoru Mariya Dimitriyevna ÇEBANOVA hem Akademik Todur ZANETin yardımcı zaametlerinnän dä.
Buluşmada pay aldılar 10, 11 hem 12-ci klasların üürencileri, lițeyin direktoru hem lițeyin romın dilindä hem literaturasında üürediciykaları Lüdmila DOYKOVA, Svetlana KIRBIYIK hem Mariya ÇEBANOVA.
