Gagauz lafını ortadan kaldırıp, Gagauziyanın Aydar küüyündä eni bir festival kurdular da 2025 yılın Harman ayın (avgust) 23-dä burada I-ci “Aydar kilim festivali” yaptılar, nereyi katıldılar Gagauziyadan hem Moldovadan kilimcilär, kilim ustaları hem türlü artistlär.
Neçin genä hiçtän başattılar? Halizdän bu yıl Aydarda lääzımdı olsun XII-ci “Gagauz kilimneri” festivali, angısı başladıldı 2013-cü yılın Harman ayın (avgust) 28-dä Aydar küüyün kurban Günündän, ama I-ci “Aydar kilim festivali” yaptılar.
Hepsi biler, ani eni bir festival başladınca sayılar hiçä döndürdülär, dä şindi esaba hem doorulaa görä, 2025 yılın Harman ayın (avgust) 23-dä Gagauziyanın Aydar küüyündä geçti I-ci “Aydar kilim festivali”.
Kimä gelmiş bu fikir, ani Aydardakı kilim festivalin adını diiştirmää? Kim uymuş memlekettä Gagauz lafına karşı gidennerin hem Gagauz lafından azetmeynnerin akılına da, kiminsä saklı kara emirlerinä izmet ederäk, bu festivafin adından Gagauz lafını kaldırıp, onu “Aydar kilim festivali” yapmış?
Aydar küüyün başında olannarda Gagauz hem Gagauzluk hodulluu hiç mi kalmadı, acaba?
Hem taa bir iş. Moldova Kultura Ministerii kendi saytında bildirdi, ani Aydarda olmuş Kilim festivali, angısı „Acces la cultură” Milli Programası çerçevesindä, Kultura Ministerii hem Etnika arası ilişkileri Agenstvosu tarafından yapılmış.
Akademik hem poet Todur ZANET, Gagauz Millli Gimnanın avtoru
