Kasım ayın (noyabri) 7-nä düşän gagauzların en büük üç yortularından birisini “Kasım yortusu”nu Kasım ayın 5-dä gözäl bir sıraylan Komrat kasabasının “Hoca Nastradin” uşak başçasında baktılar.
O günü “Hoca Nastradin” uşak başçasının 5-7 yaş arasında grupadan uşaklar, gagauz dilindä üüredici terbiediciykası Natalya İlyiniçna KROYTORun önderciliindä, gagauz adetlerinnän hem Kasım yortusunnan ilgili gösterilär yaptılar, gagauz halk oyunarını oynadılar hem sıraya görä türkü çaldılar. Belli ki o türkülerin arasında “Oglan” türküsüz dä vardı.
Bundan kaarä “Turşu kurmak” bir sțenkası gösterdilär, neredä “paneerdan” zarzavt almakta taa borkannara turşu kurmaa kadar bu işin sırasıyca yapılmasını gösterdilär.
Bu sıraylan ilgili hepsi türkü, muzıka hem oyunnarı Natalya İlyiniçna KROYTOR kendisi zaamet etti hazırlamaa. Ama uşakları sıraya hazırlamakta, el işlerini yapmakta hem “güz masasını” donatmakta uşakların anaları-bobaları da yardımcı oldular. Taa bir meraklı iş oldu, açan uşaklara “Gözäl güz” (Viktoriya KROYTOR) geldi dä uşaklarlan bilä güzün ne olduunu annattı.
Kasım yortusu sonunda zalda bulunannara hepsinä “Hoca Nastradin” uşak başçasının direktoru Veronika Födorovna KAZAK danıştı da sözündä saa olsunnar dedi uşaklara, onnarın analarına-bobalarına hem uşak başçasının zaametçilerinä bu gözäl gösteri için.
Bu sıraya gagauz yazıcısı, akademik Todur ZANET musaafir oldu. Canabisi şükür etti bu gözäl sıra için hem baaşladı “Hoca Nastradin” uşak başçasının bibliotekasına kendisinin “Gagauz masalları: masaldan masala” hem “Mamucuumnan kol-kola” kiyatlarınnan, “Ana Sözü” gazetasını.
Bu sırada bulundu Gagauziya üüredicilik Upravleniyasının zaametçiykası Lidiya OSTAŞ ta.
