2025-ci yılın Kırım ayın (dekabri) 30-da Moldovanın premyer-ministru yardımcısı hem da dışişleri hem Evropaya integrațiya ministerliin ministrusu Mihay PAPUŞOY imzaladı № 271-s-39 Kararı, angısına görä Moldova Evropa Birlii tarafından Türkiyeyä karşı koyulan sankțiyalara katılêr.
Lääzım bilmää, ani Evropa Birliinä (EB) görä Türkiyeyä karşı koyulan bu sankțiyalar “Türkiyenin Dou Ak denizdeki izinsiz aarama hem er altını delmäk çalışmalarınnan” ilgiliymiş. Sankțiyalar doorudan koyuldular Türkiye devletin “Türkiye Petrolleri Anonim Ortaklığı” kompaniyasına. Nicä açıkladılar Türkiyenin öndercileri: “Türkiyenin Dou Ak denizdeki aarama hem er altını delmäk çalışmaları zakonnu bir iştir. Bu üzerä Türkiye EB zapalarını tanımêêr hem EB baskısına verilmeyecek”.
Eridir açıklamaa, ani bu sankțiyaları EB taa 2019-cu yılda koydu hem ozamandan beeri EB o zapaları hep uzattırêr, çünkü “Türkiyenin bu çalışmalarına karşı durêrlar Rvropa Birliinä girän Grețiya hem Kipra”.
Ama Moldova EB azası diil hem dä ne üzerä Türkiyeyä karşı bu sankțiyalara katıldı, sade bir Allaa biler?!
Büünkü günädän Moldova-Türkiye arasında politika, diplomatiya, ekonomika hem soțial uurunda ikili işbirlii yıldan-yıla kaavileşärdi. Alış-veriş hem ekonomika investițiyaları yıllık 1 miliard evroya yaklaştılar.
Türkiye Türk İşbirlii hem Koordinaţiya Agenstvosu Başkannıı (TİKA) yolunnan yaklaşık 60 milion evroluk proektlar yaptı hem yapêr. Bu yollan Moldovada çok saalık, üüredicilik, soțial, sport hem kultura proektları başa çıkarıldı.
Şindi olêr ölä, ani Moldova, Türkiyeyä karşı sankțiyalar koyup, kendi elinnän bir dalını keser.
Bir şüpesiz var nicä demää, ki Türkiyenin dä hakkı var Moldovanın bu sankțiyalarına karşı eş cuvap vermää. Ama bunu yapacek mı, sanki?!
Bir iş belli: Moldovanın Türkiyeyä karşı sankțiyalara katılması var nicä bozsun Türkiyeylän büünkü günädän islää gidän durumu hem memleketin bir en önemni alış-veriş hem dä yatırım ortaannan ilişkilerin çökmesinä yol açsın.
