Baba Marta 27-dä, Bütündünnä teatru günündä, Gagauziyanın Çadır “Dionis TANASOGLU” adına Gagauz Milli teatrusu iki spektakliylän kutladı – birisi uşaklar için, birisi dä büüklär için.
Teatru günün kutlaması başladı uşaklar için dramaturg Todur ZANETın pyesasına koyulan “Mozgoroy” spektaklisindän, angısının rejisörları oldular Mihail REZUNEŢ hem Anatoliy RADULOV. Gagauz Milli teatrusu oyuncularının ustalıınnan siiredicilerin önündä, büülü hem şennik bir ortalıı dolaya yayınnayarak, cannanadılar bu gözäl hem masallı yaratmanın folklor personajları: Mozgoroy, Topal Canavar, Cadı Babusu, Mır-Mır-Kotoban, Yoluk Saksan, Kara Garga, Rusali batü, Rusalilär.
Avşam üstü büüklär işin gösterildi franțuz dramaturgun Robert THOMASın “Tuzak” pyesasına görä koyulan spektakli. Bu spektaklinin rejisöru oldu Kişinev “A. P. ÇEHOV” adına devlet rus drama teatrusunun rejisöru, Moldova Respublikanını kıymeti artistı Dimitriy KOEV.
Bütündünnä teatru gününä gözäl bir nokta da koyuldu: Gagauziya kultura Upravleniyasının adından onun başı Marina SEMÖNOVA teatruya Upravleniyanın “Şükürlük” belgesini hem Moldova kultura ministerliin Diplomnarını teatrunun aktrisasına Elena DANACIya hem teatrunun baş rejisöruna Anatoliy RADULOVa verdi.
Biz dä, “Ana Sözü” gazetsı olarak, kutlêêrız Çadır “Dionis TANASOGLU” adına Gagauz Milli teatrusunun zaametçilerini: aktörları, rejisörları, resimcileri, şafk hem ses ustalarını hem hepsini, kim kendi çalışmalarınnan baaşlêêr siiredicilerä teatru büülülüünü.
Bütündünnä teatru günü kutluca olsun!
