Ukraynadan bir grupa halk deputaları, Gagauz halkını Ukraynanın erli halkı olarak tanımak için, Ukraynanın Üüsek Radasına (Parlamentına) 2026-cı yılın Hederlez ayın 8-dän №15223 zakon proektınnan danıştılar.
Açan 2021-ci yılın Orak ayın (iyül) 1-dä Ukraynada kabledildi “Ukraynanın erli halkları için” №1616-IX Zakon, orada erli halklar olarak tanındılar krım tatarları, karaimnar hem krımçaklar. Bakmadaan ona, ani ozamannar Ukrayna Üüsek Radasının kimi halk deputatları teklif edärdilär gagauz halkını da erli halk olarak tanımaa, bu kabledilmedi.
Şindi bu soruş Ukraynada enidän önä çıkarıldı. Bu konuylan ilgili Üüsek Radaya yollanan Zakon proektında sölener, ani “bu zakon proektın uuru – Ukraynada gagauzların erli halkı olarak statusun legalizațiyası yapılêr bir neetlän: onnarın kultura, dil, üüredicilik hakların korunması, hem dä, bir halk olarak, onnarın kendiliklerini korumakta tertiplerin kurulması için”.
