Orak ayın 21-dä Gagauziya Halk Topluşu Başı Valentin GAYDARCI, Beşalma küüyündän GHT deputatı Grigoriy DÜLGER hem Dizgincä küüyündän GHT deputatı Nikolay RAYA, Orak ayın 20-dä prezidenturada olan buluşmaklan ilgili preskoferețiya yaptılar.
Preskoferețiyanın çeketmesindä GHT Başı Valentin GAYDARCI şükür etti Prezident Maya SANDUya buluşmak için hem hem dedi: “Buluşmaya gidärkän biz hazırdık dialoga, ama diil monologa… Oldu ölä, ani bizi çaardılar diil onun için, ani Halk Topluşun fikirini almaa, ama merkezin fikirini seslettirmää… Yazık, ani buluşmadan sora prezidentın presa slujbası cümneyä yayınnadı haberi, angısının maanasından çıkêr, ani Halk Topluşun deputatları kayıl oldular merkezdeki öndercilerin tekliflerinnän. Bän ofițial açıklêêrım, ani bu iş diil dooru”.
Preskoferețiyayı yapannar teklif ettilär, ani “Evropaya gidärsäk, evropadakı avtonomiyalar gibi davransınnar, ama hakklarımızı yonmasınnar”.
Preskoferețiyada urgulandı, ani “Moldova kuvetleri “Gagauziya (Gagauz Yeri) özel hak statusu için” Zakonu durmamayca ezer. Bu olêr Gagauziya Halk Topluşuna seçimnärlän dä”.
Seçimnär için söleyeräk, GHT deputatları açıkladılar, ani “Gagauziyayı, sansın rayon gibiymiş, bir seçim bölümü yapmaa istteerlär da orada partiya listelerinä görä GHT deputatları seçilsin. Bununnan kayıl diiliz, çünkü “Gagauziya (Gagauz Yeri) özel hak statusu için” Zakonunda açıktan yazılı, ki herbir küü kendi deputatını seçer. Bu statya ortadan kaldırılmadı. Bu üzerä dä seçimnär tek mandatlı bölümnerdän lääzım olsun”.
GHT Başı Valentin GAYDARCI dedi: “Gagauziyanın gelecää lääzım Gagauziya halklın tarafından kantarlansın, da bu üzerä arka olêrım cümne temsilcilerinin teklifinnän, ani nekadar tez “Gagauziya halkın temsilcilerinin III-cü Üstolan Syezdını” yapmaa”.
