Orak ayın 25-dä Komratta geçti, Gagauziya Halk Topluşu hem Moldova konstituțiyalı yurisdikțiyası İnstitutu tarafından ortak hazırlanan, “Moldova Respublikasında konstituțiya normalarına uymak – bu hak üstünnüü devletlää bir test” Halklararası bilim-praktika konferențiyası, angısının baş teması çerçevesindä hak üstünnüü devletin çalışması hem konstituțiyayalı prințipların bakılması uurunda dialog hem analiz yapıldı hem bu uurda Gagauziuya Avtonon-teretorial bölgenin özel hak statusunun gelecää incelendi hem elendi.
Konferențiyanın aarlıını göster o, ani burada pay aldılar hem nasaat ettilär: Moldova Konstituțiya Sudun eski başı Dimitriy PULBERE, Modovanın eski prezidentı Vladimir VORONİN, Moldovanın eski premyer-ministrusu, büünkü Moldova Parlamentın deputatı İon KİKU, Moldovanın eski premyer-ministrusu Aleksandr MURAVSKİY, Moldovanın eski vițe-premyer-ministrusu, dört kerä sıravardı Moldova Parlamentın deputatı olan Viktor STEPANÜK, büünkü Moldova Parlamentın deputatı Diana KARAMAN, eski prokuror hem politikacı Viktoriya FURTUNA, Gagauziyanın eski Baş prokurorı, yustițiya generalı, Gagauziya Halk Topluşu (GHT) Başın yardımcısı Georgiy LEYÇU.
Bundan kaarä konferențiyanın işindä pay aldılar Gagauziya ispolkomun öndercileri hem azaları, GHT öndercileri hem deputatları, çok sayıda yuristlär hem konstituțiya haklarında bilim doktorları, bilim insannarı.
Götürdü konferențiyayı Gagauziya Halk Topluşu Başı Valentin GAYDARCI.
Konferențiyanın baş konusu oldu Orak ayın 9-da Moldova Konstituțiya Sudun Gagauziya (Gagauz Yeri) avtonomiyasının özel hak statusunan ilgili alınan karar hem bu kararın memlekettä konstituțiyalı uygunnuu, hak üstünnüü devletin geleceenä hem merkez kuvetlerinnän Gagauziya avtonomiyasının kuvetleri arasında ilişkileri sonuçlarına dokunması.
Moldova Respublikasında konstituțiya normalarına uymak – bu hak üstünnüü devletlää bir test” Halklararası bilim-praktika konferențiyası hepsi nasaat edennär hem pay alannnar kayıl oldular onunnan, ani Moldova Konstituțiya Sudun Gagauziya (Gagauz Yeri) avtonomiyasının özel hak statusu uurunda Orak ayın 9-da alınan kararı – bu politikalı bir karar hem o kararın ömürä geçirilmesi Gagauziya (Gagauz Yeri) avtonomiyasının yokedilmesinä yolunu açtı.
Konferențiyanın sonunda kabledildi bir rezolüțiya, angısı Moldova Prezidentına, Parlamentına Pravitelstvosuna, Merkez Seşim Komisiyasına, Moldova Konstituțiya Suduna, Moldovada diplomatiya misiyalarına, Evropa Birliinä, Venețiya komisiyasına, OBSEya hem taa başka halklararsı kuruluşlara yollanacek.
Not. Moldovada kuvettä bulannarın temsilcileri bu konferențiyanın çalışmasında pay almadılar hem onun işinä karışmadılar.
