Harman ayın 17-dä Gagauziya Halk Topluşun XLVI-cı toplantısına 35 deputattan 20-si pay alandan 11 deputatı karar aldılar Gagauziya Başkanın erini boş saymaa. Ama eni Başkanın seçmä günü kabledilämedi, çünkü deputatlar bu 11 oyu da aralarından sızdıramadılar.
Yurisprudențiya tarafından bu acaba neyä geler? Bu GHT toplantısında gördük halizdän neyä geler, nezaman sa, kimin sä tarafından sölenmiş bir şaka: “Neredä iki yurist var, orada üç bakış var!” Çünkü GHT toplantısında bir soruş için yuristlarda iki ters bakış vardı, zerä yuristlar zakon normalarını başka-başka türlü açıkladılar.
Toplantının başında Gagauziya İspolkomun temsilcisi Vitaliy DEREVÄNKO urgulayıp, ani büün “Gagauziya Başkanın erini boş saymaa” soruşunu incelemäk – bu zakonsuzluk bir iştir,
açıkladı, ki daavanın kararını ömürä Probațiya organı uygunnêêr, ama o taa danışmadı GHTya Başkanın erini boş saymaa deyni. Vitaliy DEREVÄNKO dedi: “Konuylan ilgili Üüsek daavacılık Palatasının kararı ortada taa yok, bu üzerä dä daava kararı I-ci daavacılık instanțiyasına yoktu nicä geeri yollansın, da onnar onu Probațiya organına yollasınnar. Bu kıpımda bizdä yok ne daavanın ne dä Probațiya organın Halk Topluşa danışması Başkanın erini boş saymaa deyni. Buna görä her angı bir karar alınması ya da bu soruşun Halk Topluşu gündeliinä koymak zakonsuzluk bir iştir”.
Kendi tarafından Gagauziya Halk Topluşun yuristı İgor KENDİGELÄN urguladı, ki “zakona görä, Apeläțiya Palatasının kararı kesindir, bakmadaan ona, ani Üüsek daavacılık Palatası tarafından enidän incelenäbilinir. Bu üzerä karar kuvedä geçti da GHTnın hakı var Başkanın erini boş saymaa”.
GHT deputatı Demyan KARASENİ teklif etti bu soruşu incelämemää hem onu gündelik işindän çıkarmaa: “Siz nereyi alatlêêrsınız, sizä deyni sade Başkanın eri boş sayılsın mı?”
Bundan sora deputatlar “Gagauziya Başkanın erini boş saymaa” soruşunu gündelik işindän çıkarmasını oylamaya koydular. Ama soruş geçmedi. Bu üzerä GHT toplantısında bulunan Gagauziyanın İspolkomu azaları, protest ederäk, zaldan çıktılar.
Evgeniya GUȚULun Gagauziya Başkankası kuvedindän ayırıldılması sebepinnän “Gagauziya Başkanın erini boş saymaa” soruş için GHT toplantısında bulunan 20 deputattan 11-ri oyunu kullandı:
Soțialistlar frakțiyası: İvan DİMİTROGLU (Komrat № 4 s.b.), Elena YURÇENKO (Çadır № 7 s.b.), Aleksandr TOPORAŞ (Valkaneş № 8 s.b.), Mihail SAVASTİN (Valkaneş № 9 s.b.), Pötr FAZLI (Valkaneş № 10 s.b.), Leonid KÖSÄ (Çeşmä küüyü № 16 s.b.) hem Mihail POPOV (Ütülü küüyü № 20 s.b.).
Baamsız deputatlar: Georgiya LEYÇU (Çadır № 6 s.b.), Vladimir KISSA (Bucak № 15 s.b.), Valentin GAYDARCI (Karbalı № 23 s.b.) hem Nikolay ORMANCI (Kırlannar (Kotovskoe) № 32 s.b.).
Gagauziya Başkanın seçmä günü soruşu Gagauziya Halk Topluşunda geçmedi dä bu iş GHTnın ayırı bir toplantısında gündelik işinä koyulacek.
Bu günkü dayanışmadan sora gözüker, ani Gagauziya Halk Topluşun “Gagauziya Başkanın erini boş saymaa” 11 deputatlık kararı, belliki, daavacılaa taşınacek.
Eridir urgulamaa, ani 2026-cı yılın Hederlez ayın 28-dä Gagauziya Başkankasının Evgeniya GUȚULun advokatları Canabisinin hakında I-ci daavacılık kararını diiştirilmedik brakmakta Kararını, temizlemäk için, Moldovanın Üüsek daavacılık Palatasına danıştılar.
Akademik hem poet Todur ZANET, Gagauz Millli Gimnanın avtoru
