2026-cı yılın Ceviz ayın 30-da Gagauziyanın Regional Galereyasında geçti bir yortulu sıra, neredä kutlanıldı Gagauziyanın Pötr Draganov adına Merkez bibliotekanın kurulma gününün 80-ci yıldönümü, neredä buyur edildilär hem pay aladılar bibliotekacılar hem kultura zaametçileri, yazıcılar, erindi kuvetlerin temsilcileri, bibliotekanın ortakları hem okuycuları. Hepsi musaafirleri karşladılar “Elegiya” kemençecilär ansamblisinin gözäl havaları.
Açtı sırayı Pötr Draganov adına Merkez bibliotekasının direktoru Marina NEDÄLKOVA, angısı kendi sözündä kısadan annattı bibliotekanın 1946-cı yılda kurulmasından büünkü günädän çalışmalarını hem bir küçük bibliotakadan Gagauziyanın Merkez bibliotekasınadan kalkınmasını.
Sora kutlama nasaatlarınnan danıştılar: Gagauziya kultura Upravleniyasının başı Marina SEMÖNOVA, Gagauziya İspolkomu Predsedatelin hem Gagauziya Başkanın yardımcısı İlya UZUN, Moldova Milli bibliotekasının zaametçiykası Ekaterina DİMİTRİK, 1970-ci yıllarda Komrat rayonun kultura bölümünün başı Klavdiya BALABAN, Komrat kasaba Sovetin azası Valeriy KISSA, yazıcı hem poet, Akademik Todur ZANET, yazıcılar Stepan BULGAR hem Konstantin KURDOGU.
Bu yıldönümünnän ilgili olarak, yortulu sırada Gagauziya kultura Upravleniyasının diplomalarınnan ödüllendilär: Pötr Draganov adına Merkez bibliotekasının direktoru Marina NEDÄLKOVA, biblioteka bölümü başı Tatyana KİRİYAK, baş bibliotekacıyka Evgeniya LÜLENOVA, bibliotekacıykalar – Vera SİBOVA, Elena SUSAN, Nadejda TOPAL hem Vasilisa VORNİKOGLU.
Kutlama yortusunda üürencilär okudular Mihay EMİNESKUnun, Dimitri KARAÇOBANın, Vladimir MAYAKOVSKİYyin hem Marina ȚVETAEVAnın yaratmalarını. Ayırıca uşaklar tarafından muzaka kutlamaları da oldu. Üürenciyka Olga GAYDARCI çaldı “Bucak” adlı türküyü. Üürediciyka İrina MELKAN önderciliindä Komrat Yaratmak Evin kolektivı da iki nomer gösterdi.
Gagauziyanın Pötr Draganov adına Merkez bibliotekasının gagauzça fondu kurulmaa başladı XX-ci asirin 50-ci yıllarda, açan 1959-cu yılda dünneyä geldi Dionis TANASOGLU tarafından hazırlanan gagauz literaturasının ilk toplumunu – “Bucaktan seslär”. Sora da, hep o asirin 60-cı yılların başında, başlayıp Nikolay BABOGLUnun kiyatlarından, bu bibliotekaya gagauz ruhu hem gagauz yazıcıların kiyatları, taa sora da arhivları, gelmää başladılar. Büünkü gündä bunnardan oluştu bibliotekanın 5 bindän zeedesi olan gagauz dilindä fondu.
Şindi Gagauziyanın Pötr Draganov adına Merkez bibliotekasının fondunda var 53 bindän çok kiyat hem türlü dokumentlär. Onnarın 3700-dän zeedesi devlet dilindä.
