Kasım ayın 7-dä bakılêr gagauzların en büük yortularından birisi – KASIM günü (kışın çeketmesi), ani taa iki büük yortumuzlan, “Canavar yortuları”nan hem “Hederlez” yortusunnan (Hederlez ayın 6-sı, yazın çeketmesi) var hem olacek milletimizin en zengin varlıı. Bu yıl, KASIM gününda, Kasım ayın 7-dä, Gagauziyada “Gagauz şarap yortusu – 2026” sırasını kutladılar. “Gagauz şarap yortusu” Gagauziyada 2007-ci yılda kuruldu. Bölecä olêr, ani ondokuz yıllık şarap yortusunu binnän yıllık Kasım yortusu günündä kutladılar.
Komrat meydanında düzennenän “Gagauz şarap yortusu – 2026” sırasına katıldı binnän insan: şarpçılar, kultura insannarı hem el zanaatları ustaları, aşırıdan musaafirlär, popazlar, politikacılar hem Gagauziya öndercileri.
Kendi musaafirliklerini göstermää deyni Gagauziyanın 18 küüyündä hem kasabalarından temsilcilär meydanda kendi aullarını hem çadırlarını erleştirdilär, sergi açtılar, sofralarını kurdular, şaraplan musaafirleri ikram ettilär.
Belliki, şarap yortusunda şarapçılar kendi malını gösterdilär hem en islää şaraplar için ödül kablettilär.
“Gagauz şarap yortusu – 2026” sırasının kultura bölümündä pay aldılar hem insannarı şennendirdilär Gagauziyanın ansamblileri, aşırıdan gelän muzıkantlar hem çalgıcılar, anılmış türkücülär hem artistlär.
Yortunun açılışında, Gagauziya kultura Upravleniyasının zaametlerinnän, Gagauziyanın uşak hem büüklär ansamblileridän 300-zä yakın artistlär gagauz halk oyunnarı fleşmobunu yaptılar.
Bu yıl, ondokuz yıl geçän “Gagauz şarap yortusu” sırasında, iki ayırıntı özellik tä oldu:
Birincisi – “Gagauz şarap yortusu – 2026” sırasına Türkiyedän seftä usta açşılar (Fatma Mesut, Ayça Özcan, Chef Reanato hem Arzu Yıldız) katıldılar, angıları türk imeklirini hazırlamakta kendi ustalıklarını gösterdilär.
İkincisi dä – yortuya aşırı sırada Gagauziya Başkannıına hem Gagauziya Halk Topluşu deputatlıına kandidatların katılmaları, angıları hepsi savaşardılar insannara yakınnııklarını hem, bal-şerbet olup, yalpaklıklarını göstermää.
