baskannaa-kandidatlat_II_tur

16.11.2026, tarafından yazılı , CÜMNE, POLİTİKA BÖLÜMÜ, 414 KERÄ BAKILMIŞ

“Tavşan-kandidat”lar işini yaptılar: birinci turda kimsey Gagauziya Başkanı seçilmedi

Kasım ayın 15-dä Gagauziya Başkanı hem Gagauziya Halk Topluşu deputatların seçimneri oldu, angılarında pay aldı 48 749 seçimci (hepsi 129 179 seçimcidän 37,60%).

Hepsi 67 seçim bölümünün protokollarını incelediktän sora, Gagauziya Merkez Seçim Soveti (MSS) açıkladı, ani, ön esaplara görä, Gagauziya Başkanı seçimnerindä en çok oy aldı baamsız kandidat Aleksandr STOYANOGLO – 38,44% (18 136 oy). İkinci oldu Moldova Soțialistlär partiyasının kandidatı Födor GAGAUZ – 24,22% (11 426 oy). Bölecä bu iki kişi Gagauziya Başkanı seçimnerinin Kasımın 29-da olacek 2-ci turuna geçtilär.

Bu iki kandidata en yakın oldu baamsız kandidat Kornel DUDNİK – 15,59% (7 354 oy). Kalan kandidatlar bukadar oy aldılar: İvanna KÖKSAL (baamsız) – 11,05% (5 216 oy); Sergey ANASTASOV (baamsız) – 4,72% (2 225 oy);  Oleg GARİZAN (baamsız) – 1 502 oy (3,18%); Pötr VLAH (Eni İstoriyalı Seçim partiyası) – 1,98% (934 oy); İvan KILÇIK (Gagauz Halk partiyası) – 0,83% (391 oy).

Şindi, 2-ci tura hazırlanmaklar çekettiynän, annaşılacek kim bu seçimnerdä bileräk, ani geçmeyecek, kendi kandidaturalarını “tavşan-kandidat” (“kandidat-spoyler” (kandidat bozucu)) olarak koydu hem kimin için çalıştı.

Ne düşer Gagauziya Halk Topluşu deputatların seçimneri için sölemää: belli oldu, ani 35 seçim bölümndä 21-dä olacek 2-ci tur. Birindä dä, Baurçu küüyündä, (seçimcilär eçii aşılmadıı için) enidän, seçim olacek.

BİR CUVAP YAZIN