Bitki vakıtlar, hristiannıın temelini bozmaa deyni, insanın üstünä türlü bozucu dalgalar gelerlär. Hristiannıın duşmannarı çeşitli yollarlan savaşêrlar bozmaa uşakların fikirlerini hem cannarı, gençleri dooru yoldan sapıtmaa. Buna nicä karşı koymaa? Bu belayı atlatmaa deyni hepsimiz lääzım birleşelim: klisä, cümne, şkola. Onuştan Çiçek ayın 28-dä Dizgincä küüyündä, bu problemaların incelenmesinnän ilgili, bir metodologiya seminarı oldu. Seminarın temasıydı: «Школа и церковь: партнерство в области образования и воспитания».
Seminarı ortaklıkta hazırladılar Komrat-Kaul eparhiyası, Gagauziyanın üüredicilik Upravleniyası, Dizgincä teoretik liţeyi. Onnara kafadarlık yardımında bulundı Gagauziyadan “Birlikte iyilik” cümnä Birlii. Seminarda pay aldılar Moldova Mitropoliyasının metodika upravleniyasının azaları, Gagauziya şkolaların direktorları, popazlar, kultura hem cümne insannarı. Maasuz seminar için kiyat sergileri hem uşakların resim sergisi hazırlanmıştı.
Seminarın neet uurları böläydilär:
- cümnedä ruh hem esap terbietmesinin diriltmesinä yardımcı olmaa;
- şkolada “Din” predmetın üürenmesinnän ruh hem esap terbietmesindä ön becerilii ilerletmää;
- “Din” predmetın üürenmesinä meraklıı zeedeletmää.
Seminarın açılışında nasaat ettilär Gagauziyanın baş popazı Ay-Boba Pötr KELEŞ (Komrat-Kaul eparhiyasının episkopunun adından), Gagauziyanın üüredicilik Upravleniyasının geçici başı Mariya SİRKELİ, Dizgincä teoretik liţeyin direktoru Anna KOLŢOVA.
Ay-Boba Pötr KELEŞ urguladı, ani popazlar popaz olaceykana vererlär söz “Allahın sözünü cümneyä annatmaa”. Onuştan zalda bulunan üüredicilerä Canabisi bölä sözlärlän danıştı: “Paalı bizim üüredicilerimiz, sizin hem bizim omuzlarımızda büük hem cuvaplı bir ük var: Allahın sözünü annatmaa, ona üüretmää. Üüretmää – bu büük bir cuvapçılıktır!”
Üüredicilik Upravleniyasının geçici başı Mariya SİRKELİ bütün ürektän dedi: “Büünkü meropriyatie çoktan pişärdi. Biz duyardık, ani sizinnän birliktä lääzım nesaydı yapalım, ani yaşamamızı islää tarafa diiştirelim, ani bizim uşaklarımız kabletsinnär onu, ne verili onnara Hristiannık haklarınnan”.
Dizgincä liţeyin direktoru Anna KOLŢOVA, annadarak liţeydä “Din” predmetın üürenmesi için dedi: “Liţey pedsovetının kararınnan 2014-cü yılın Ceviz ayın (sentäbri) 1-dän beeri “Din” predmetını 2-ci klaslara vereriz. Analar-bobalar büük havezlän bunu kablettilär. Büün, onnarlan lafederäk, annêêrız, ani dooru adım atmışık. Kesin bileriz, ani bu kendi meevalarını verecek. Büüklär lääzım düşünsünnär – gelecää nesoy evlatboylarını brakacez. Büün, uşaan canında varsa Allaha inan, biz bileriz, ani o uşak respublikamızın haliz vatandaşı olacek”.
Sora, Dizgincä küüyün Ayozlu Troiţa klisenin popazı ierey Vasiliy, gösterdi nicä yapêr uşaklarlan uroo. Urok duadan başladı. Sora uşaklara “Ayozlu Serafim Sorovskiy” için annadıldı, onun yaşaması için multfilm gösterildi.
Seminarda bölä temalara dokladlar açıklandı: «Мир глазами детей» (Komrat sport liţeyin üüredicisi Anna NİKOLAEVA), «Роль семьи в формировании духовно-нравственных ценностей» (Svetloe şkolasının üüredicisi Anna KALECİ), «Внешняя альтернативная работа по религиозному воспитанию на примере Воскресных Школ» (Kıpçak küüyün popazı protoierey Vitaliy ZELİNSKİY), «Религия в школе: реальность и перспективы» (Gagauziyanın üüredicilik Upravleniyasının geçici başı Mariya SİRKELİ), «Статус и внедрение курса Религии в школах Республики Молдова» (Anjela LEVİNŢA, Moldova).
Seminara katılan Moldova Mitropoliyasının metodika upravleniyasının azası Ay-Boba OKTAVEAN (Moşan) açıkladı, ani “Allahın lafını lääzım şkolalarda üüretmää, körpä cannarı yannışlıklardan korumaa hem kurtarmaa deyni”.
Gagauz yazıcısı hem cümne insanı Todur ZANET bildirdi cümne insana, ani “şkolalarda lääzım hemen “Din” predmetını üüretmää, zerä hristiannıı yok etmää deyni onun üstünää büük dalgalar üüyüşer”. Canabisi urguladı, ani “Büünkü seminar – bu bir dönülmeyän nokta. Büün bu seminarı dooru annarsaydık, bundan sora şkolalarda “Din” hem “Hristiannık” urokların koyacez. Bunu şindi yapmarsak, Hristiannıın üstünä gelän yokedici dalga hepsimizi yudacek. Onuştan sayêrım, ani bu, şkolalarda yapılan en önemli seminarlardan birisi, da bölä seminarlar lääzım hepsi şkolalarda yapılsın. Hiç birisi diil lääzım karşı çıksın ona, ani şkolalarda lääzım uşaklara dinnerin özlerini üüretmää hem Hristiannıı üüretmää. Hristiannık – o bir direk, o bir öz, ani bizi taa üsttä tutêr, ani vermeer kolayını, ayaklarımızdan çekip, bataklık dibinä sürüsünnär!”
Gagauziya “Birlikte iyilik” cümnä Birliin temsilcisi Andrey MİHAYLOV annattı nicä karar alınmış bu seminara yardımm etmää. Canabisi dedi: “Ay-Boba VASİLİYdän üürendik, ani bu seminar olacek. Cimne Birliimiz hem onun predsedateli Ruslan GARBALI hemen karar aldılar, ani buna yardımcı olacez. Zerä evlatboylarımızın ruh terbiedilmesi bizdän da biter. Biz herzaman hazırız yardım etmää kliseyä onun eni çalışmalarında”.
Seminarın sonunda hepsinä deyni konţert gösterildi.
