Hederlez ayın (may) 6-da gagauzların hem Gagauziyanın ikinci (Kasımdan sora) en büük milli yortusunda – Hederlezdä – Çadır kasabasında 20-ci kerä “Altın At” atlılar yarışmaları oldu. Bu yarışmalar herkerä Moldovada tek olan “At-Prolin” beygir fermasının ipodromunda geçerlär.
“Altın At” yarışmaların ofiţial açılışını Gagauziya Başkanı İrina VLAH yaptı. Sora insannarın önündä nasaat ettilär Gagaauziya Halk Topluşun başı Dimitriy KONSTANTİNOV hem Moldova parlamentın soţialistlär partiyasından deputatı Vladimir ŢURKAN.
Sora tribunaların önündän sıravardı edektän geçirdilär hepsi beygirleri da “At-Prolin” beygir fermasının direktoru Konstantin KELEŞ onnar için annattı. Bundan sora da çeşitli nominaţiyalarda yarışmalar başladı.
20-ci “Altın At” yarışmalarında ensedilär:
Başkanın ödülündä – genä ensedi Georgiy TATAR (Kırlannar küüyü). Bu yıl ona, kilim hem diplomadan kaarä, Gagauziya Başkanının geçän Koboo da verildi;
İki yıllık atlarda – Mihail ZLATOV (Komrat kasabası, haygır – “Vodopad”);
Üç yıllık atlarda – Väçeslav PRİSÊKARU (Çimişli kasabası, beygir – “Lüminal”);
Dört yıllık atlarda – Vasiliy TATAR (haygır – “Jaşkov”);
Beş yıllık atlarda – Sergey SKRİPNİK (Çimişli kasabası, haygır – “Darley”);
Beş yaştan büük atlarda – Sergey ZAMŞELKİN (Esirli küüyü, Basarbka rayonu, beygir – “Fakir”).
Yarışmalarda enseyennerä ödüllär, diplomalar hem işadamı Yuriy YAKUBOVun adından para baaşışları verildi. Ödülleri verennerin arasında vardılar Başkan İrina VLAH, GHT başı Dimitriy KONSTANTİNOV, Türkiye Büükelçisi Mehmet Selim KARTAL, Rusiya Büükelçisi Farit MUHAMETŞİN (kendi adından JK-televizor baaşladı).
Not. 20-ci “Altın At” yarışmalarında pay aldılar Gagauziyadan, Pridnestrovyadan, Kaul, Basarabka, Çimişli hem Taraklı rayonnarından atlar hem atlılar.
Yarışmadan öncä, bu koşular yortusuna gelän insannarın önündä, kendi ustalıını gösterdilär gagauz oyun ansamblileri hem sölistleri.
