Hederlez ayın (may) 9-da bütün dünnä faşizmayı tepelemedä Büük Enseyişin 70-ci yıldönümünü kutladı. Devletlerin çoyunda asker paradları hem yortulu mitinglar oldu. Bakıldı bu gün Gagauziyada da.
Gagauziyanın herbir küüyündä hem kasabasında “Kurtarıcı askerlerin” anmak taşlarına hem memoriallarına çiçek koyuldu. Orada yortulu mitinglar yapıldı. Avşam üstü salütlar yapıldı.
Komratta bu yortu insannarın hem iş kolektivların paradınnan kutlandı. Bu paradta Gagauziya Başkanı İrina VLAH hem Gagaauziya Halk Topluşun başı Dimitriy KONSTANTİNOV, cenk veteranı hem iş veterannarı, İspolkomun azaları hem GHT deputatları, Komradın öndercileri, askerlär hem poliţiya işçileri, sıradakı insannar.
Parad kasabanın primariyasından Komradın “Kurtarıcı-askerlerin memorialına” örüdü. Memorialda yortulu miting oldu. Mitingta ilk nasaan etti Gagauziya Başkanı İrina VLAH. Nasaatından sora da Canabisi Komratta tek kalan cenk veteranına Sergey SVİRİDENKOya yubiley medaliyi “Büük Enseyişin 70-ci yıldönümü” verdi.
Bundan kaarä yortulu mitingta söz tuttular GHT başı Dimitriy KONSTANTİNOV, cenk veteranı Sergey SVİRİDENKO, Gagauziya asker merkezin başı Andrey RUSU, asker popazı protoierey Väçeslav, liţeylerin üürencileri.
Anmak için susmak minudundan sora memorialın hem dayma ateşin yanına venoklar hem çiçeklär koyuldu.
