Gagauziya Başkanı İrina VLAHın yardımınnan Hederlez ayın (may) 9 avşamsı Komradın “Kurtarıcı-askerlerin memorialında” bütün dünnä faşizmayı tepelemedä Büük Enseyişin 70-ci yıldönümünä baaşlanan “1418 günnän gecä” patriotika akţiyası yapıldı.
Akţiyada komratlılar hem musaafirlär memorialın eşiklerindä hem önündä 1418 mum yaktılar – o titsi cengin herbir günü için birär mum. Sora, anmak meropriyatiyanın programasına görä, ilkin gösterildi kısa bir film. Nedän sora da ortaya “Enseyiş Bayraa” çıkarıldı (Reystagın tepesinä koyulan bayraan kopiyası).
Kutlama sözlärlän memorialda toplanan insannara danıştılar Başkan İrina VLAH, MR parlamentın deputatı İgor DODON, GHT deputatı Nikolay KİOR.
Nasaatlardan sora konţert gösterildi, angısında cenk vakıdının hem cenk için türkülär çalındı. Meropriyatiya yortulu salütlan başarıldı.
