Kirez ayın (iyün) 4-dä Çöşmä küüyün üstünä yaamurlan hem toluylan bilä büük bir bora geldi. Boranın lüzgär kuvedi sekundta 13-15 metraydı. Yımırta gibi tolular hem bakırdan yaamur Çöşmä küüyün yapılarına, aullarına hem tarlalarına büük zarar getirdi.
Nicä bildirdi Gagauziyanın Üstolan durumnarın upravleniyası lüzgär aldı Çöşmä küüyü liţeyin örtüsünü hem da küüyün taa 61evinä zarar etti, çok erlerdän kopardı elektrika tellerini hem gaz boruları, 775 ektar tarlayı hem insannarın aullarını darmadaan etti, çok aaçları hem meeva fidannarını kırdı.
Esaplar taa yapılmadı, ama beklener, ani boradan zarar 3 milion leyä yaklaşacek. Sadä Çöşmä küüyü liţeyinä zararın büüklüü 400 bin leyä yakın görüner. Liţeyä lääzım olacek eni örtü koyulsun hem kimi odalara enidän tertiplenmä yapılsın, 27 metra aul hem gaz borusu düzülsün, pençerelerä şişelär koyulsun.
Zararlar var Tülü küüyündä da.
