Uşakları koruma Gününä karşı Gagauziyanın Regional resim galereyasında sekizinci kerä kuruldu uşak resim sergisi. Burada sergilendi Komrat, Çadır hem Valkaneş resimci şkolaların hem Avdarma küüyün yaratmak Evin üürencilerin yaratmaları.
Serginin açılışında geldilär uşaklar analar boalarlan, üüredicilär, kultura insannarı, politikacılar. Kalmadı bir tarafta bu önemni olaydan Gagauziya Başkanı İrina VLAH ta. Canabisi kutladı sergiyä katılınnarı hem açıkladı, ani Gagauziya herzaman yardımcı olacek onnara.
Sergidä bir konţertlän kendi becerikliini gösterdilär Komrat muzıka şkolasının üürencileri da.
