Başlayıp 2016-cı yılın Büük ayın (yanvar) 1-dän vraçlar hem medsestralar kabledeceklär zarplataların üstünä para da. O paranın ölçüsü ilgili olacek onunnan, ani nekadar islää onnar yılaçladılar hastaları.
Bunu, mediklerin “Sănătatea” profsoyuzun istediklerinä cuvap verärkana, bildirdi Moldova saalık ministrusu Ruksanda GLAVAN.
“Sănătatea” profsoyuzu sa isteer, an bişeyä bakmadaan, hepsi vraçların hem medsestraların zarplatası 25% zeedelensin. Zerä büünkü gündä, bakarak devlettä ortalama zarplatanın uuruna, onnarın zarplatası taa aşaada bulunêr.
Ruksanda GLAVAN urguladı: “Bän söz vermeerim, ani zarplatalar 25% zeedelenecek. İlkin genç speţialistlär, allelem, 50% taa zeedä kabledeceklär. Kalanı, beki, 10-15% taa zeedä kabledeceklär. Naçalniklerin üüsek zarplatalarına son verilecek. Küsmesinnär, ama Milli strahovaniye kompaniyanın kimi işçileri ayda dokuz bin ley zarplata kableder, şindi taa aaz kabledeceklär”.
