Cumaa gecesi, Kasımın 13-dä Franţiyanın başkasabasında Parijda teroristlerin atakası oldu. Atakaların keezleri oldular stadion, konţert salonu, restorannar, barlar hem piţariyalar: orada neredä çok insannar toplandıydı. Hepsi atakaların sayısı 6 oldu. Bu saatta teror kurbannarın sayısı bölä: 129 ölü, 352 aar yaralı. Yaralıların 99 ölüm kertiindä bulunêrlar.
Cumêrtesi avşamneyin Parijın prokuroru Françolis MOLİNS teraktın sırasını adım-adım açıkladı:
21:20 (Parij vakıdı) – “Stade de France” stadionunda Franţiya-Germaniya futbol matçın ortasında stadionun “D” girişinä karşı ilk patlama oldu. Patlama erindä iki ölü bulundu. Birisinin sırtında patlamak mallarınnan dolu kayış baalıydı.
21:25 – Parijın 10-cu bölümündä bir bir barın hem bir restoranın muşterilerinin üstüna Kalaşnikov avtomatından ateş atıldı. Burada 15 kişi öldürüldü hem 10 yaralandı.
21:32 – Parijın 11-ci bölümündä bir barın önündä insannarın üstüna avtomatlardan ateş atıldı. 5 kişi öldürüldü, 8 aar yaralandı.
21:36 – bir restoranın terasasında 19 kişi avtomatlardan öldürüldü.
21:40 – bir restoranın içindä “diri bomba” kendisini patlattı.
21:40 – “Le Bataclan” konţert zalanda 3 kişi avtomatlardan ateş açtı. Sora orkestra kuyusuna zalojnikleri kuudular.
00:20 – speţnaz başladı “Le Bataclan” konţert zalanda kurtarmak operaţiyasını. Teroristlerin birisini urdular. Urduynan onun üstündä bomba patladı. Kalanı 2 terorist üstlerindä bulunan bombaları kendileri patlattılar.
Terorist atakaların beterinä Franţiyada üstolan durum açıklandı. Graniţalar kapalı. Parija asker çekildi. İnsannara teklif edildi evlerindän çıkmasınnar.
Terorist atakasının kurbannarını anmaa deyni Franţiyada 3 günnük yas açıklandı.
Bu titsi olaylarlan ilgili olarak bütün dünnäda insannar, Franţiya devletin büükelçiliklerinä çiçek getirip, franţuz halkına kendi acızgannıını hem birliini bildirerlär.
