Kasım ayın 17-dä Kiriyet küüyün “Dionis TANASOGLU” adına teoretik liţeyindä, 9-cu klaslar için, seftä geçti pek meraklı bit intelektual oyunu – “KİM İSTEER OLMAA HALİZ GAGAUZ”. Hazırladı onu liţeyin gagauz dilindä hem literaturasında üüredici Anna Kirilovna KOLOMİİTSEVA.
Oyunun temelindä bulunêr anılmış intelektual oyunu. Onuştan o viktorina biçimindä geçti. herbir soruşa dört cuvap verilärdi. Oyuncular lääzımdı o dört cuvaptan doorusunu yada doorularını ayırsınnar. Herliim oyuncular zorlanarsalar cuvap vermää, ozaman onnara 4 yardım kolaylıı verilirdi: 1 – Zaldan yardım; 2 – 50:50; 3 – Dosta zil; 4 – Yannışlaa hak.
Oyun vakıdı cuvaba zorlanan oyuncular telefondan yardım istedilär gagauz poetından hem yazıcısından Todur ZANETtän, Çadır “M.GUBOGLU” adına teoretik liţeyin gagauz dilindä hem literaturasında üüredicisindän Oksana BRATANdan, “Dionis TANASOGLU” adına teoretik liţeyin gagauz dilindä hem literaturasında üüredicisindän Antonina RADOVAdan, Beşalma “M.GUBOGLU” adına istoriya hem etnografiiya muzeyin direktorundan Lüdmila KARAÇOBANdan.
Oyun bittiynän belli oldu, ani onda ensedilär hem Haliz Gagauz kendilerini gösterdilär 9-cu klasın üürencilär: İvanna KURDOGLU hem Anna DRAGANOVA.
Kapanış nasaatını yaparkana üüredici Anna Kirilovna KOLOMİİTSEVA kutladı oyunda enseyän Haliz gagauzları hem hepsini kim onda pay aldı, hem da teklif etti, ani hepsimiz savaşalım hergün Haliz Gagauz olmaa. Canabisi sözünü başardı YAŞASIN GAGAUZLUK laflarınnan.
PATRETTÄ: Sergey ARSENİ, Anna Kirilovna KOLOMİİTSEVA, Anna DRAGANOVA, İvanna KURDOGLU hem Nikolay TAŞOGLU.
Yuliya JEREBŢOVA, 9-cu klasın üürencisi.
