Büük ayın 21-dä Gagauziyada baktılar Babu gününü. Bu yortu kurulmuş küü babuları hem lufusalar için. O üzerä da Babu gününü bakêrlar sadä karılar.
En üüsek uurda Babu gününü maasuz bir meropriyatiyada kutladılar Çadır kasabasında. Kutlamalara katıldılar Gagauziya Başkanı İrina VLAH, GHT başın yardımcısı Natalya ŞOŞEVA, İspolkomun hem Halk Toluşun karı azaları, Çadır hem Gagauziyaya girmeyän Taraklı rayonun insannarı.
Sıraları bakarkana, yortuya katılannara kendi oyunnarını gösterdi ansambli “Düz Ava”.
Not. Evellär bu yortuyu küü babusunun evindä bakarmışlar. Karılar getirärmişlär babuya kolaçlan kaniska, peşkir, rakı sabunu, çorap. Küü babusu yaparmış masa da hepsini ikram edärmiş. Sora karılar pindirärmişlär babuyu bir kızaa yada taligaya da, kendileri koşulup ona, çekärmişlär babuyu pınaradan, neredä babuyu yıslarmışlar suylan.
Babunun bayraa varmış: pardıya baalanmış bir kuşak. Pardının ucuna saplarmışlar bir da alma. Bayraa taşıyarmış karının birisi. Karşı gelän adamnar savaşarmışlar almayı kapmaa. Babu korunarmış, kuşaklan saurup, ürküdärmiş onnarı. Adamnardan karılar istärmişlär ödek, şarap yada para: ödesinnär babuyu da babu getirsin onnara kız yada çocuk. Herliim adamnar ödek verämärsalar – onnarı yıslarmışlar.
