Çiçek ayın (aprel) 27-dä, taman gagauzların apostolunun, aydınnadıcımızın, büük bilim hem klisä adamımızın, Protoierey Ay-Boba Mihail ÇAKİRin duuma günündä, öndercilerin kararına görä, Gagauziyada “Ana Dilimiz” yortusu kutlanıldı (2009-cu yıladan bu yortu Orak ayın (iyül) 30-da bakılardı).
Bu gündän ileri, bir ayın içindä, Gagauziyada Gagauz dilimizlän ilgili türlü meropriyatiyalar yapıldı: yazıcılarlan hem poetlarlan buluşmaklar, şkolalarda hem uşak başçalarında kiyat hem resim sergileri, peet hem resim yarışmaları, kiyatların prezentaţiyaları hem literatura master-klasları. Yortunun taa büük faydası olsun deyni, baş kutlamalar bu yıl Çadırda, Komratta hem Valkaneştä yapıldılar, hem da birdän, saat 14:00 başladılar.
Çadır kasabası. Çadır kasabasında kutlamalar Mihail ÇAKİRin anmak taşının yanında yapıldı. Orada toplandılar kasabanın hem rayonun öndercileri, üürencileri hem üüredicileri, uşak başçalarından uşaklar hem terbiedicilär, yazıcılar hem kultura insannarı. Mihail ÇAKİRin anmak taşının çiçek koymaktan sora, üürencilär hem genç yazıcılar kendi saygılarını hem sevgilerini Gagauz dilinä gösterdilär peet hem annatma okumaklarınnan. Üürencilerdän hem uşak başçası uşaklarından kaarä kendi yaratmalarını okudular poetesa Alöna ERGOGLO hem proza yazıcısı Vasiliy RUSEV. Çadır Valentin MOŞKOV teoretik liţeyin üürencileri, başta kendilerin gagauz dilindä hem literaturasında üürediciykalarınnan Elena LAZAREVAylan, pek meraklı hem gözäl Gagauz dilindä nasaat ettilär hem gagauz yazıcıların yaratmaklarını okudular.
Valkaneş kasabası. Valkaneştä “Ana dilimiz” yortusu primariyanın büük başında kutlandı. Yortunun programasını hazırladı hem yortuyu götürdü Valkaneş kultura Evin metodistı Vasilisa FURMAN. Kutlamalarda pay aldılar üürencilär, analar-bobalar, rayon öndercisi Födor TERZİ, kultura Evin işçileri hem artistleri. Kutlama programası kuruldu ölä, ani taa çok valkaneşli poetları anmaa deyni. Onuştan aarlık verildi raametli poetın İvan İvanoviç PAVLİOGLUnun yaratmalarına. Onun peetlerini okudular 1-ci liţeyin 8-ci klaslarından üürencilär Vlada TORLUPA (okudu peeti “Gagauz Bayraa”) hem da Svetlana KİRÇU (okudu peeti “Valkaneş”) hem 3-cü gimnaziyanın 6-cı klasatan üürencisi Oleg KREŢU (okudu peeti “Bir yıldız”). Kendi peetlerini “Ana Dili” için okudular 1-ci liţeyin 12-ci klastan üürenciykalar Oksana KOLBAN hem Tatyana DRAGNEVA. Ana Dili için “Ana Dilimiz” literatura kompoziţiyasını yaptı hem okudu “Olimp” genç yaratma grupası (önderci – İrina YALAMA). Gagauz dilini kutlama yortusunda pay aldı Valkaneşin kultura Evindän genç halk muzıkası ansablisi “Genç Olannar” (önderci – Boris KALÇU). Yortu zamanında uşaklar Ana dilindä hem Ana Dili için türküleri çaldılar.
Komrat kasabası. “Ana dilimiz” yortusunun en görümnü hem tantallı kutlamaları Komratta geçti. Gagauziya öndercileri öndä, studentlarlan üürencilär hem üüredicilär arkada, Moldova hem Gagauziya bayrakları, Gagauz dilinän Ana dili için transporantlar ellerindä, duhovoy orkestra marşlarınnan, yortuya katılannar Komrat sokaklarında gezindilär. Sora Komrat Devlet Universitetın (KDU) önündä bulan Mihail ÇAKİRin anmak taşına çiçek koyuldu. Çiçek koyuldu Dimitriy KARAÇOBANını anmak taşına da. Ama neçin sa çiçek koyulmadı literaturamıza hem Ana Dilimizin ilerlemesinä hem korunmasına taa da büük kuvet koyan hem taa da çok yaratmak dünneyä baaşlayan gagauz yazıcılarımızın Dionis TANASOGLUnun, Nikolay BABOGLUnun hem Stepan KUROGLUnun byustlarına, angıları birkaç metra taa aşaada hep “Şan Aleyası”nda bulunêrlar. Bundan sora da, KDUnun eşiklerindä kutlama mitingı oldu. Mitingta nasaat ettilär Gagauziya Başkanı İrina VLAH, Halk Topluşu Başı Dimitriy KONSTANTİNOV, Komrat primarı Sergey ANASTASOV hem başkaları. Liţeylerin üürencileri hem uşak başçalarından uşaklar peet okudular. Kendi yaratmaklarını okudular genç poetlar İlya KARASENİ, Alla BÜÜK, Kristina KOÇAN hem başkaları. Mitin zamanında, nasaat etmäk hem peet okumak arasında, gagauz ansamblileri hem Gagauziya artistleri gagauz dilindä konţert gösterdilär. Foto – gagauzmedia.md
