Harman ayın (avgust) 28-dä, Aydar küüyün klisesinin Kurban günündä, burada “GAGAUZ KİLİMNERİ – 2016” IV-cü Festivali geçti. Aydarlılardan kaarä Festivalda pay aldılar kilimcilär hem muzeylär Gagauziyaylan Ukraynanın gagauz küülerindän da. Onnar getirdilär hem sergiledilär ellän dokunmuş ev kilimnerini.
Aydar küüyün primarı İlya KÖSÄ bildirdi, ani “GAGAUZ KİLİMNERİ” Festivali küüdä 2013-cü yıldan beeri geçer. Festiavlin çerçevesindä sekiz uurda (“Gran-Pri”, “kilimcilik ustası”, “evelki kilim” hem taa başka) diplomalar veriler.
Bu yıl “Gran-Pri” diplomasını aldı Çöşmä küüyündän İordana Födorovna SOKOLOVA, angısı sergiledi 1928-ci yılda yapılı bir kilimi.
Bundan kaarä gagauz imekleri yapıldı hem musaafirelrä konaklandı. Festivaldä Gagauziyanın Aydar hem Ukraynanın Aleksandrovka küüylerin arasında kardaşlık annaşması imzalandı.
“GAGAUZ KİLİMNERİ – 2016” IV-cü Festivali başarıldı büük bir kultura programasınnan. Onda vardı oyun da, türkü da, “Büük Horu” da.
