2021-ci yılın Büük ayın (yanvar) 21-dä Avdarma küüyündän Olga Georgievna UZUN, saaselem doldup 95 yaşını, bu gözäl yıldönümünü kutladı. Bu ayozlu gündä küüyün mețenatı İlya KAZMALI baaşladı Canabisinä pek paalı bir baaşış – eletromobil BAIC BJEV R500. Mețenatn adından bu baaşışı Olga Georgievnaya auluna getirdi hem kendisinä verdi Avdarma küüyün Gagauziya Halk Topluşun deputatı Elena Födorovna KARAMİT.
Yubilärkayı kutlarkana Elena Födorovna KARAMİT dedi: “Oli bulü, bän geldim büün kutlamaa sizi duuma gününüzlän. Bän sizi saalıkta gördüm, ayakta sizi buldum! Da ko ileri dooru da taa diil bir yıl ölä ayakta olasınız! Herbir günü gözäl karşılayasınız! Da hiç acınız olmasın! Ko saalıınız kaavi olsun! Ko uşacıklarınız da dayma açsınnar kapunuzu!”
Büünkü gündä Olga Georgievna UZUN Avdarma küüyün en yaşlı insanı. Uzun ömüründä Canabisi çok kahır geçirdi: II-ci dünnää cengini da, 1946-1947 yılların aaçlıını da, ölä denilän koliktivizațiyayı da, açan gelärdi, ani yaşamaya kuvet kalmêêr. Ama, durmamayca Allaha dua edip, kendisini sıkıp, hep ileri gitti, duudurup hem büüdüp altı uşak. Yazık, ani, ana olarak, o uşakların üçünü artık topraa verdi. Üçüncüsünü, oolunu, Oli bulü bu yıl, Koladaya karşı kaybetti. Onuştan, bezbelli, Elena Födorovna KARAMİTın kutlama sözlerinä bölä cuvap etti: “Hem paalı, hem paalı bän sanardım ileri – para. Oof, diil para! Hem paalı – saalık! Saalıın varkana – hepsi var. Hepsi! Of! Ama açan yok saalıın hem, açan uşaan kaybeler, yok näpmaa. Bişey yardım edämeerim, hiç! Açan da kalêrım yalnız, isteerim aalaamaa, ama taa da zor. Ama faydası yok. Yok faydası! Naşey yapalım?!”
Nicä da olsa Olga Georgievnanın yaşamasında çok kısmetli günnär da vardı hem var. Onnarın birisi da oldu 2021-ci yılın Büük ayın (yanvar) 21-ri, açan Canabisi hiç beklänmeyän bu baaşışı kabletti. Baaşışı kabledärkenä Olga Georgievnanın hiç inanacaa da gelmäzdi, ani birkaç yıl geeri kendisinnän lafedärkenä İlya KAZMALI diil şakadan, ama halizdän laf vermiş baaşlamaa Canabisinä bir maşina.
Maşinaya oturduynana Olga Georgievna UZUN dedi: “Onun [İlya Mihayloviçin] lafçaazını büün da tutêrım aklımda. Durdu lafında, mari! Bän sandım şaka söleer. Ama şakadan bak ne kära urmuş. Allahım, Panaiyacıım, şakadan bak ne kär olmuş! Nesoy söleyim da yanılmayım?! Nesoy İlişka bukaa düşünmüş, ani ölä yapmaa?! Bu iilii yapmaa! Bodaprosti! Panaiya, İsuzum, bodaprosti! Olsun bu dünnääda bizim, öbür dünnääda da olsun mamusunnan papasına! Bodaprosti, Göktä Bobam! Şükür sana, ani bu kısmeti bana verdin!”
Bu sevinçli gündä Olga Georgievna yanında bulundular hem onu kutladılar Canabisinin yakınnarı hem kızlarınnan unukaları da.
Biz da, “Ana Sözü” redakțiyası olarak, kutlêêrız Canabisini bu gözäl yıldönümünnän. Saalık hem uzun ömür sizä, Olga Georgievna!
