2025-ci yılın Ceviz ayın (sentäbri) 12-dä Kıpçak küüyün Recep Tayyip ERDOĞAN adına 4-cü uşak başçasında, Çadır primariyasının kanadı altında olan, “Mirkiras” Cümne Asoțiațiyası “Oyuncak” kukla teatrusu kendisinin “Kvak-kvak, dolayda batak” üçüncü spektaklisini gösterdi.
Uşaklar için “Kvak-kvak, dolayda batak” pyesasını yazdı dramarurg Todur ZANET. Onun rejisöru oldu “Oyuncak” kukla teatrunun öndercisi Mihail KONSTANTİNOV. Spektakliyi uşaklara deyni oynattılar aktörlar: Mihail KONSTANTİNOV, Andrey REDJEPOV, Nataliya İVANÇUK hem Nataliya MANASTIRLI. Ses operatou – Aleksey KİROGLU.
Tarafımızın ekologiya zorluklarını annadan bu spektakli gözäl hem başarılı oldu. Uşaklar büük meraklan hem sevinmeliklän onu karşladılar. Kalmadılar bir tarafta Tayyip ERDOĞAN adına 4-cü uşak başçasınının öndercileri hem zaametçileri da, ani bütün ürektän karşladılar “Oyuncak” kukla teatrusunun izmetçilerini.
“Oyuncak” kukla teatrusunun premyerası oldu 2024-cü yılın Kasım ayın 27-dä, açan o seftä gösterdi Todur ZANETin yazdıı “Rız otu” kukla spektaklisini. Sora da, 2025-ci yılın Çiçek ayın 28-dä gösterdi hep o avtorun ikinci spektaklisini dä – “Fet-Frumos hem padişahın kızı”.
