Orak ayın (iyül) 27-dä Gagauziyada “Can Dalgasında” I-ci gagauz êstrada yarışmanın 1-ci turu geçti. Turda 21 türkücü pay aldı. Onnarın 14-dü 2-ci tura geçti.
Jüri azaları (Vasilisa PETROVİÇ, İlya FİLEV, İvan LÜLENOV, Mihail KULEV, Olesä BARLADÄN) şindilik kendi sözünü söledilär. Umut ederiz, ani 2-ci (Canavar ayında olacek) turda da onnar hep bölä açık cannarlan “Can Dalgasında” I-ci gagauz êstrada yarışmanda enseyeni ayıraceklar. İnanêrız, ani o enseyän da olacek en isleesi. İnsan da Gagauziyayı “Türkvizion-2016” yarışmasında halizdän temsil edecek. Ama…
I-ci turdan sora ortada fasıl laflar gezmää başladı: KONKURS MAAMİLÄ SURAT yapılarmış, zerä enseyenin adı artık belliymiş. Buna yukardan izin gelmişmiş.
Bu lafları inanmêêrım. Zerä bu öläsaydı, konkursu hazırlayannar taa köktän keserlär hepsini: gençlerin umudunu, doorulaa, insannaa hem devletliimizä inancı.
Onuştan bu lafları İNANMAA İSTÄMEERİM. Zerä bilerim, ani Jüri azaları pek başarılı, dooru hem açık gözlü insannar. Sanmêêrım, ani Jüri azaları var nicä şindiki öndercilerin izinnerinä (herliim o izinnär varsa?) uysunnar. ONNAR LÄÄZIM GÖRSÜNNÄR ASLISINI, PAKLAYIP ASLIYI ÇAMURLU İZİNNERDÄN.
Biz da umutlan “Can Dalgasında” I-ci gagauz êstrada yarışmanını finalını bekleyecez. Da o finaldan sora görecez aslı mı bu gezän laflar hem ad, osa yalan mı. Bunu da pek kolay önünüzdä açıklayacez.
Akademik, poet Todur ZANET
Patret – GRT reportajınından
