Büünkü günä görä Moldovada COVİD-19 hastaların sayısı 80501 kişi oldu. Ölennär – 1882 oldu. Son vakıtta may her gün koronavirusa uşalan insan olêr. 1 bindän zeedä Bunnar da sadä ofițial olarak. Ofițial olmayan statistikaya görä sa kaç bin hastalanêr sadä bir Allaa biler.
Gene dä ofițial statiskiya bakarsak, ilkyazın hastalanan insannarın sayısı 5 katına taa aazdı, ama devlet kuvetleri Moldovayı Üstolan durumu zapasına koyduydu (bak: http://anasozu.com/moldovada-60-gunnuk-ustolan-durumu-kuruldu/).
Tutêrsınız mı aklınızda Moldovada koronavirus patlaması neredän başladı? Dooru – Hınçeşt rayonunda Moldova Parlamentına soțialistlara taa bir deputatın seçilmesinin zorlamasından. Ozaman hepsi bilärdi, ani orada COVİD-19-zun ateşi tutuştuydu, ama kuvetlär onu vakıdında sündürmedilär – soțialistlara deputat lääzımdı.
Şindi sa COVİD-19dan bütün Moldova yanêr, ama Prezidentın seçimneri beterinä kuvetlär bunu görmää istämeerlär – bir umursuz brakıp vatandaşlarımız bu kıran çúmaya ulaşsınnar, pek islää bileräk, ani seçim bölümneri bu çúmanın yayılma ocaklarıdır.
Biläsiniz, Kasımın 15-dä olan Prezidentın II-ci turundan sora Moldovayı, Evropa gibi, aar bir karantina kapayaceklar,ama geç olacek, zerä o zamanadan koronavirusun amansız ateşin yalazları insannarımızı hem memleketimizin ekonomikası çatır-çatır yanacek.
Kimä bu lääzım?
Belli ki, yalak yanında bulunannara, angıları, hoburlar gibi, insannarın kemiklerindä esapsız hem ținizmalı bir seçim politikası yapêrlar, bakmadaan ona, ani bolnițalar dolu, ofițial hastaların sayısı 80 bini geçti, ölennär 2 binä yaklaşêr hem insannar hep taa sinek gibi ölerlär.
Hakikattan çúma kıranı zamanında politikadan cadıların düünü.
Akademik Todur ZANET
