Orak ayın (iyül) 8-dä, Gagauziya kultura Upravleniyasının zaametinnän, Gagauziyada “Aylä, sevda hem baalılık günü” yortusu bakıldı. Bu Gün ilgili hristian kalendarının Ay Petri hem Aya Fevroniya gününnän, ani sayılêrlar sevgi, baalılık hem aylä mutluluu koruyucuları. Yortunun baş sıraları Kazayak küüyün parkında hem o parkın sțenasında geçirildi.
“Aylä, sevda hem baalılık günü” yortusu sırasının ofițial açılışında, burayı toplanan insannara, nasaatlarlan danıştılar Gagauziyanın öndercileri, erindeki kuvetlerin temsilcileri, cümne insannar hem popazlar.
Bundan sora başladı büük bir konțert, angısında pay aldılar Gagauziyanın anılmış artistları hem vokal ansamblileri, Gagauziya kliselerin pazar şkolalarından yaratmak kolektivleri.
Konțert zamanı, sțenada kurulan arka ekranda, gösterildi birkaç vidioklip, ani hazırlanmıştılar maasuz bu yortu için.
“Aylä, sevda hem baalılık günü” yortusu sırasında seftä gösterildi hem tanışmak oldu Yuliya ARNAUTun çaldıı “Analar” (laflar –Todur ZANET, muzıka –İliya FİLEV) türküsünün videoklipınnan. Genç türkücüyka Viktoriya ARNAUTun çaldıı “Zamannayêrsın, evi!” (laflar –Todur ZANET) türküsünä dä bir videoklip gösterildi.
Sțenadan ötän başka türkülär dä büük sevinmeliklän hem meraklıklan karşılandılar. Çünkü hepsi onnar aylä, sevgi hem baalılık içindilär. Yortu da, türkülär dä gösterdilär hem aklımıza getirdilär, ani insanın yaşamasında en paalı hem önemni er – onun aylesi. Zerä aylä – bu bir yuva, neredä biz üüreneriz sevmää, biri-birimizi annamaa, prost etmää hem biri-birimizä arka olmaa.
Yortu sırasında parkta türlü oyun erleri hem el ustalık sergileri açıldı.
