Büük ayın 22-dä Moldova Parlamentın spikerı İgor KORMAN hem Moldovanın Premyer-ministrusu İurie LEANKA Gagauziya Halk Topluşun sesiyasında pay almaa deyni Komrada geldilär. Canabilerinnän bilä Gagauziyanın baş kasabasına geldilär Moldovanın kimi ministruları hem Moldova Parlamentın deputatları da.
Hem İgor KORMAN, hem da İurie LEANKA GHT tribanasından annattılar ne kolaylıklar verecek gagauzlara Moldovanın Eropaya girmesi. Aalaştılar, ani para etişmeer hepsi yolları düzmää hem yaşamayı kolaylatmaa. Adadılar, ani Gagauziyanın problemalarını çözmää deyni hem komisiya kurulacek, hem da bir devlet programası yapılacek. Ama…
Canabileri açıktan urguladılar, ani 2014-cü yıl Moldovada hem Gagauziyada seçimnär yılı. Seçimnerdän sora kim Moldova Parlamentına seçilecek, kim spiker olacek, kim Premyer-ministrusu belli diil. Onuştan ne İgor KORMAN ne da İurie LEANKA açıktan sölämedilär kim sözdä olacek komisiyanın hem devlet programası için cuvapçı olacek. Bu programa olurasa hem o başa çıkarılmarsa, kimdän esap sorulacek, belli diil.
Kendi nasaatlarında GHT deputatları urguladılar, ani Moldova Parlamentın spikerın hem Premyer-ministrunun nasaatları bu sadä laflar. Lääzım iş yapılsın. O işlerin arasında “Gagauziya (Gagauz Yeri) özel hak statusu için” Zakonun halizdän işlemesi, Gagauziyaya merkezdän en aazdan üç katına taa zeedä para yollanması, saalık hem soţial uurunda dooruluk…
GHT deputatları urguladılar, ani Kişinevda hem Kişinevdan Gagauziyaya karşı bir sürü dalga kaldırılêr: “Küçük ayın 2-dä yapılacek Referndum dolayında ajiotaj”, sudların zakazlı hem yannış kararları, Baş prokuraturanın ceza işleri açması, Komratta devlet Kanţeläriyanın “zakonnardan dışarı” davranmaları, komşu devletin doorudan Moldovanın iç işlerinä karışması h.t.b.
Buluşmanın sonunda Moldovanın öndercileri urguladılar, ani “karşılıklı konuşma olmadı, herkezi sadä kendi konuştu” da umut ettilär, ani gelecektä “konuşmalar taa başarılı olceklar”.
Moldova Parlamentın spikerı İgor KORMAN hem Moldovanın Premyer-ministrusu İurie LEANKA Gagauziyanın Halk Toplşuşu sesiyasından ayırıldıktan sora, GHT deputatları kapalı kapu ardında kendi çalışmalarını ilerlettilär.
Not.Halk Topluşun sesiyasına, deputatlardan kaarä, katıldılar Moldovanın kimi ministruları, Gagauziyanın primarları hem İspolkom azaları.
Foto – .parlament.md
